Ang mga bata ug ako

Buot ni sa mga magtutudlo nga mahatagan og seminar ang kabataan kalabot ning Campus Journalism. Tumong ug tuyo nako nga maapil ang high school apan sa dihang nidumili ang high school gumikan sa ilang kalihukan mao nga nabalibaran na lang nako nuon si Insoy sige lang sa sunod na lang siya kanang daghan na ang motambong aron dili mausik ang iyang kahago. Ang akong concentration mao lamang ang mga bata nga kanako nipaduol.

Mao nga sa inato nga paagi ako lang silang gitudloan sa mga basics kay dili man gyud tawon ako suhito niini. Dunay usa ka bata nga nakapahatag nako og igong pagtagad. Iyang gihimo nga ako lang gyud kuno ang makadungog sa iyang obra nga siya mismo ang nagbasa. Simple lang ang iyang pagsulat apan puno sa kamatinud-anon ang tanan.

Pila ray sugilanon nahuman ra gyud ang maong panagtigom dungan ang pagpangutana sa ilang mga magtutudlo: “Mam kinsa man ang imong first love?” Kabahin kini sa ilang paghimo og interview. Kini agig ilang practicum. Hinuon balikan pa man usab kini aron sa ingon mas mahanas pa gyud sila. Hashasan kun kinsa kanila ang mamahimong andam ug tagana sa dakong misyon sa pagsulat o pagtagik sa mga bulawanong hunahuna ug kahimatngon sa usa ka bata.

Sa maong panagtigum daghan ko og nakat-onan:

1. Ang kabataan bisan pa man kun sabaan ang dunay ikapaambit sa gihapon.

2. Puno sa kamamugnaon ang ilang hunahuna ug pagbati.

3. Kusog ang ilang imahinasyon nga bisan unsang mosulod sa ilang hunahuna mahimong ilang sulaton sa pulong nga yano ug masabtan gayud.

Nakaamgo ko nga sa pagsulat diay bisan gani sa lindog mahinungdanon ang kayano. Ang kayano maimong birtud sa pagsuwat. Tuyo niini nga mas masabtan pa gayud ang imong hunahuna ug pagbati. Mas konkreto mas maayo. Mao nga sugod karon akong paningkamotan nga mamahimong mas yano ang tanan nga atong isuwat ug labaw sa tanan mamahimong mas yano ang atong kinabuhi aron mas makasabot ang matag tawo sa kahulogan sa gitawag nilang kamatuoran. Human sa maong panagpundok nagkukabildo kaming mga gurang ug sa maong kukabildo mas nasinati namo ang Ginoo.