Illegal swertres
RENBOR PATROL - Rene U. Borromeo (Banat) - October 19, 2019 - 12:00am

Maghisgot ko karon og isyu kabahin sa pagkuyanap sa illegal swertres dinhi sa Dakbayan sa Sugbo, ug sa ubang bahin sa kalungsuran nga gipasagdan ra gyud sa atong kapolisan.

Wala malilong kanako ang pagdagsang sa illegal swertres, nga ang uban kanila nagpatuo nga legal kay migamit gyud og “booth” nga mora’g legal sila kay kunohay gitugotan sa Philippine Charity Sweepstakes Office.

Ang pag-ila sa mga illegal swertres outlets mao nga ang ihatag nimo nga tiket, sinuwat ra sa kamot, ug dili sama sa ticket nga makuha nimo kon mopalit ka og lotto.  Miisa ang akong kilay kay may usa ka Marcelo Bernardo nga nag-post og hulagway nila ni Koronel Gemma Vinluan ug Alfredo Tan, sa social media unya may caption nga mora’g nagpasangil nga si Tan nalambigit kuno sa illegal swertres. Dili pa hinoon ko motoo niini.

Matud pa sa usa ka Marcelo Bernardo nga “Kaya pala hindi natatakot kasi kaibigan ang police head.” Si Vinluan maoy director sa Cebu City Police Office samtang si Tan, opisyal sa Cebu City Police Advisory Council.

Akong klaruhon, kontra kaayo nako kining illegal swertres ug gani mabasa tingali ninyo nga gisuwat ko kini sa makadaghan na nga higayon.

Apan ang wala nako magustohi kay kini si Marcelo Bernardo, mikopya sa akong opinion column sa Banat News nga makita usab sa social media ug iyang gikopya, dayon gi-post niya kaniadtong Lunes sa gabii nga gipatuong iya kining sinuwat.

Unya, kagahapon, gi-post na usab niya ang hulagway nila ni Vinluan ug Tan nga nagtupad. Akong klaruhon nga kana si Marcelo Bernardo, dili ako. Para kanako, angay nga si Pido Tan motingog kabahin niining isyuha.

* * *

Nahinumdom lang hinoon ko sa gisulti sa akong suod nga amigo nga dunay tawo nga mipahatud og P30,000 ngadto kang Major Chuck Barandog, isip duha ka semana niyang “payola” gikan sa usa ka illegal swertres operator dinhi sa Sugbo.

Gi-follow up nako si Major Barandog niini nga isyu ug iyang giangkon nga tinuod, dunay tawo nga mihatud kaniya og P30,000 kay ang illegal swertres operator mi-budget kaniya og tag P15,000 ang semana.

Sa laktud, gibalibaran ni Major Barandog ang gihatag unta nga kuwarta para kaniya. Akong gipangutana si Major Barandog kun kinsa ang nagpahatag sa maong kuwarta, giingnan ko niya nga usa gihapon ka opisyal sa Police Advisory Council.

Mao tingali nga napasanginlan niini si Pido Tan kay opisyal man siya sa PAC dinhi sa siyudad.

Karon, nganong wala man molusad og pagpanakop ang kapolisan ubos ni Koronel Vinluan sa mga illegal swertres operator?

Si Mayor Edgardo Labella ako na nga giingnan nga ubos sa Republic Act 8551, ang mayor maoy gitahasan pag-superbisar sa hugtanay nga kampanya batok sa mga ilegal nga sugal.

ILLEGAL SWERTRES
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with