Dili ikapangagda

Bisan sa kadaghan na nga mga panghitabo nga dunay nag viral sa social media nga hubo nga hulagway nga gi upload sa mga tawong walay puangod anaa gihapoy daghang mabiktima.

Kasagaran mga babaye kinsa mahigmata nalang nga nayatakan na gyud ang iyang kadungganan.

Sama nalang niining usa ka babayeng midangop sa Regional Anti Cybercrime Unit sa PNP kay gibaharan siya sa iyang live in partner nga i upload ang hubo nga hulagway ug ubang sex scandal kun dili kini mosugot nga dimdimon ang iyang pagkababaye.

Kanunay lang kuno kini gamiton sa lalaki kun balibaran siya sa babaye busa wala na kaagwanta ang babaye og gipa entrap ang lalaki.

Naposasan gyud ang lalaki kinsa nagpakiluoy nga dili siya tinud-on tungod ug alang sa ilang duha ka mga anak.

Maayo ra usab nga patilawon gyud og priso ang ingon niini nga klase sa tawo nga hilabihan ka abusado nga mismo ang inahan sa iyang mga anak binaboyon man.

Matud sa lalaki nga nahimo niya ang pagpanghulga tungod sa selos kay nakakita kuno og laing binuhat ang iyang kapuyo.

Sakit man kun tinood man gani nga gihulipan siya og lain apan dili kini rason nga bastoson ang usa ka tawo pinaagi sa pagpakauwaw sa tibook kalibutan.

Dili sa pagunsa alang sa mga babaye dili gyud unta mosugot nga kuhaan og hulagway o video ang lawas kay sagrado kana.

Bisan moingon pa ang lalaki nga for entertainment purposes lang bisan asawa ayaw gyud og sugot kay basin masipyat unya na ma-popular gyud.

Ok ra siguro mag sexhibition apan himoon kini sa dapit nga kamo rang duha ug walay camera kay mao kining butanga nga dili ikapangagda kay alang ra kini sa mga nilalang nga nahigugma.

Ang lawas sa babaye ug lalaki nga nagkagustohay exclusive lang sa usag usa ug dili para sa public consumption.

Sa mga lalaki labaw na nga panalipdan ang dungog sa babaye kay gikan kita sa sabakan sa atong inahan nga babaye sa kadungganan.