Ang Pobre ug ang VIP

Sa panahon karon gihatagan ba gyud unta og importansya ang patas nga pagtagad o “EQUALITY” sa bisan unsa nga hut-ong sa katilingban ilabi na sa hisgotanan sa panerbisyo sa katawhan. Walay pobre ug walay adunahan tungod kay kita’ng pareho ra man nga tawo niining kalibutan.

Apan subo palandungogn nga aduna diay gihapoy ingon niini nga diskriminasyon nga nahitabo sa atong katilingban ug sa buhatan pa gyud sa gobierno.

Dakong sagpa ilabi na sa mga nagdumala karon kinsa sinsero unta kaayo sa kausaban nga ilang gitinguha nga mahatag sa tanan nga mga tawong ilang maserbisyohan.

Usa ka suking tigbasa sa akong lindog ang mipaambit sa iyang nadunggan dihang usa ka babayeng kawani sa usa ka local government unit ang ginawong og ingon sa ilang labaw sa pulong nga hilabihan ka “humiliating” ngadto sa tawo nga hingtungdan.

Nahitabo sa duha ka kawani, ang usa pobre ug ang usa gikan o konektado sa pribadong kompanya.

Matud sa lider “ikaw tampolana kay naa man ka sa LGU naa ka sa ubos kanunay, ug ikaw “Tampolano kay gikan man ka sa dakong kompaniya Very Important Person ka o VIP nga mahimo ra nimo sugoon bisan unsa si Tampolana bisan imo siyang pasilhigon o pakamangon, ug kay VIP man ka mahimo gani ka serbisyohan ug silbihan pa ka og pagkaon. Unsa ingon ani na diay ni karon?

Daw nahilis sa kauwaw ug migamay intawon kaayo ang pagtan-aw sa babayeng kawani tungod kay nahitabo kini sa pagpaila ila kanila, ang mga tawo gud nga nakadungog murag maoy gibati sa kalooy ug kauwaw matud pa sa atong letter sender.

Tungod kay kabus man, aw nagpailob lang intawon ang pobreng babaye tungod lagi kay nanarbaho ra man siya.

Ang naasoy’ng babaye wala mangaplay kondili siya ang gitanyagan og position kay gikan man usab kini sa pribadong kompaniya nga iyang napalambo dihang nagtrabaho pa siya niini. Apan ang nakapaubos pa gyud kay inay kadto ang iyang position nga unang gitanyag kaniya, gibutang man siya sa mas ubos nga position.

Literal nga nahitabo nga nagkamang kamang intawon kuno siya ug nagkadunsingot sa bug-at nga trabaho nga haum ug angay lang unta sa mga lalaki.

Sa walay pagkusmod gidawat ug gihimo sa babaye ang naasoyng trabaho aron mabugtian ang gisweldo kaniya.

Apan ang edad sa naasoyng babayeng trabahante hapit na intawon mag senior citizen kinsa nag inusara nga mihimo sa trabaho nga angayan unta sa tulo ngadto sa upat ka lalaki.

Kining empleyadoha nalipay kaau nga nakaalagad sa lgu kay ang nangulo niini maka-kabus man o pro-poor walay gipili bisan kinsa atimanon gyud, gani hands on kaayo sa mga programa alang sa katawhan.

Anugon kon makahig siya sa gihimo sa iyang mga sakop kay sa panahon karon abtik na kaayo ang mga tawo ilabi na ang mga netizens nga mopaak dayon sa mga estorya sa pagpalabi labi. Maayo nalang kay wala mahuna huna ang letter sender o si Tampolana sa pag post niini sa social media.

Bitaw walay datu walay pobre sa kalibutan diin gipatibabaw nato ang makatawhanon nga pagpakabana sa usag usa.

Mahimong tinood kini nga sugalinon mahimong fiction apan sa mga naligsan pasensya na hinaut magsilbe kining pahigmata nga dili maayo magpalabi labi sa isig ka tawo.

Bato-Bato sa Langit ang maigo GUILTY!