Modernong Carbon Public Market?

Lisud katuhoan. Tiaw moy pila na ka tuig kining Carbon Market. ug pila na ka Mayor ang nagpuli-puli padumala sa dakbayan sa Sugbo (lagmit lungsod pa tingali ang Sugbo).

Atong hinumdoman nga dihay mga efforts pag-limpiyo ug pag-decongest sa Carbon Market, apan, kutob rat a diha. Nagpabiling samok, piot, baho, ug daghan pang mga snatcher. Dugang niini, nakatampo sa problema sa trapiko.

Busa, kining mga laraw pag-modernize sa Carbon Market, lisud katuhoan. Mahimo kaha ni niining administrasyon ni Mayor Edgar Labella? Kon matuman man (nganong dili man?), daku kining kalipay kanatong mga Sugbuanon.

Tiaw moy mora lang unya tang mangompra sulod sa mga mall ug sa modernong mga merkado!

Convenient na unya kaayo ang atong pagpangompra diha sa Carbon Market. Alang nako, bisa’g wa mo magkinahanglan sa akong opinion, kay kinsa man ko, kinahanglan ipadayon kining maong laraw.

Sa iyang pagpahibawo niining maong proyekto pag-modernize sa Carbon Market, si Labella namahayag nga tulo ka storey ang tukoron, nga kining maong structure mag-accommodate na sa mga stalls, parking area, ug bagsakan kon kining alang sa mga ihatud o pundahanan sa mga butang-igbabaligya. Kining maong moderno nga Carbon Market, matud ni Labella, mahisama na unya sa mga modernong merkado sa ubang mauswagong nasud sa Asia.

Pinaagi sa gitawag nga PPP kon Public, Private, Partnership, ang motukod ning maong proyekto mao ang SM Prime Holdings Inc.

Sa ato pa, walay gasto ang atong kagamhanan. Ang tuyo ni Labella mao nga dili mabintahaan ang dabayan, kundili, ma-beneficial kini alang sa dakbayan sa Sugbo

Dugang niini, mipadayag usab si Labella nga ang management o ang pagdumala sa Carbon Market anaa gihapon sa dakbayan. Ug bahin sa mga market vendors, unsay ilang dangatan? Ma-wani ba sila? Mawad-an naba sila ilang pamatigayon? Sa akong hunahuna, dili mahitabo nga mapadaplin ang mga nanindahay karon sa Carbon Market.

Alang nako, sila ang angyan hatagan og priority nga makabaligya sulod ning maong laraw nga modernong public market. Dugang niini, nabalaka sila nga momahal na unya ang bayranan sa abang sa mga stalls, ug correspondingly momahal usab ang presyo sa ilang mga baligya. Tingali unya kono nga silang mga gagmayng negosyante pulihan sa mga higanting magpapatigayon.

Valid kining maong kahingawa. Nga kon ako namaligya lang og mani o saging diha sa Carbon, dili kaha ko nila padaplin pabor sa usa ka milyonaryong negosyante?

Sa iyang bahin, ania ang hingpit nga pamahayag ni Labella nga napatik sa The Freeman:  “No one will be displaced. Vendors will be given preferential treatment. For additional stallholders, I will create a committee that would be very objective, partial and not imbued with political color.

“I want to put a stipulation in the terms of reference that SM would not put up a store or any commercial outlets that would compete with the meat vendors, fish vendors, and fruit vendors that are existing in the Carbon Market.”

So, kaninyog mga market vendors sa Carbon, wala kamoy angay kabalak-an. Gipasalig usab ni Labella nga ang pagdawat unya sa mga stall holders dili ibasi sa politika.  Hinaut nga tumanon kini unya sa Committee nga tukoron.