Daghan nang mga priso nga gipagawas tungod sa kontrobersiyal nga Good Conduct Time Allowance Law, apil na gani ang mga legal gyud nga gipabuhian sa Bureau of Corrections human nahatagan og parole ug na-acquit sa ilang kaso ang nitahan pagbalik sa maong ahensya.
Pipila kanila dili gani bangis nga krimen ang ilang salaod apan sa gihapon nitahan sila sa ilang kaugalingon. Dili tungod kay maoy mando sa presidente kondili ang pakapin nga bahad sa pangulo.
Si Duterte mimando sa kapolisan nga pangdakpon og balik ang mga kombiktadong gipagawas pinaagi sa GCTA Law dungan usab sa pag-awhag kanila nga motahan og balik sa ilang kaugalingon kay basin “things can go wrong (dunay dili maayong mahitabo.)”
Kung unsa kahay gipasabot sa presidente, apan nakapalisang kini sa maong mga kombiktado hinungdan nga milapas na hinuon sa gidaghanon sa gi-release sa GCTA ang nitahan pagbalik. Kinsa man guy dili manigurado, mismo ang kapolisan nga igo rang nidawat sa mga nitahan ug ang mismong taga BuCor wala gyud mohatag og klarong instruksyon.
Walay tamdanan kun kinsa lang gyud ang ilang dakpon pagbalik o dawaton kun motahan, kay hasta ang mga legal nga gipagawas sa prisohan tungod sa pagka-acquit sa ilang kaso o nahatagan na og parole ilaha man gihapong gidawat nga magpapriso pag-usab.
Sumala pa nga ang BuCor mibutyag nga 1,914 ka kombiktado sa mga bangis nga krimen ang ilang gibuhian pinaagi sa GCTA, apan karon 2,009 na ka mga inmates ang nitahan. Sobra og dul-an 100.
Daghan ang misaway niining gipabuhian sa BuCor ang mga kombiktado sa bangis nga krimen nga dili unta sakop sa GCTA law, apan mas salawayon pa gyud kining walay klaro nilang pagdawat og balik apil sa mga wala buhii pinaagi sa GCTA Law.
Maayong klaruhon kining tanan tungod kay dili makatarunganon alang niadtong nagbag-o na ug nahatagan og kagawasan pinaagi sa GCTA law ilabi na kadtong mga masakiton ug tiguwang na tungod sa maayong binuhatan samtang sila napriso pa, balikon og priso para lang aning sayop sa BuCor.