Kalangay pagsagang sa ASF
Posibleng katin-awan sa kapakyas sa Department of Agriculture (DA) pagpahibawo dayon sa katawhan, o bisan ang ubang buhatan sa gobyerno na lang, sa pagsud sa kagaw sa African Swine Flu (ASF):
Nitumaw ang gidudahang mga kaso sa ASF human ni-resign si kanhi Agriculture Secretary Manny Piñol ug sa wa pa itudlo si Agriculture Secretary William Dar.
Nagsunud-sunod og kamatay ang daghang baboy nga gidudahang may ASF sa Rizal ug Bulacan niadtong Hulyo 25, o 28 ka adlaw human ni-resign si Piñol ug 12 ka adlaw sa wa pa itudlo si Dar.
* * *
Bisan nagpabilin pa si Piñol sa DA human sa iyang resignasyon niadtong Hunyo 27, gipahibawo niya ang Malakanyang nga ang iya nang undersecretaries ang moduma sa DA samtang mangita si Presidente Rodrigo Duterte og ikapuli niya sa mosunod nga 30 ka adlaw.
Mahimong wa na mahatagi og importansiya ni Piñol ang suspitsado nga mga kaso sa ASF kay gitingob nang iyang panahon pagsaway sa economic managers nga gikutlo sa presidente nga nihulagway ni Piñol nga pulos ra hangin ug pagpangandam sa bag-o niyang katungdanan sa Mindanao Development Authority (MinDA).
* * *
Tuod man, naabtan ang presidente og kapin sa buwan pagtudlo og puli ni Piñol. Paglingkod ni Dar natanggong na og duha ka semana ang kasayuran nga human sa napu ka buwan nga pagbantay may gidudahan nang mga kaso sa ASF sa Luzon.
Natino sa Animal Disease Diagnostic and Reference Laboratory (ADDRL) sa DA nga may ASF ang blood samples sa nangamatay nga mga baboy niadtong Hunyo 16, napu ka adlaw human sa paglingkod ni Dar nga mahimong wa pa hingpit nga makapahimutang sa iyang buhatan.
* * *
Apan ang pagka-atol sa ASF sa pag-usab sa liderato sa DA di makapasaylo sa pagpabaya nilang Piñol ug Dar sa pag-alerto dayon sa nasud aron makatabang sa tanang pagpugong sa pagkatap sa ASF ug nga di mameligro ang P260 bilyones nga industriya sa baboy nga gisaligan sa minilyon ka Pilipinhon sa ilang panginabuhi.
Di sab kalikay sa responsibilidad ang presidente. Tungod sa iyang naandan nga pagtudlo og mga opisyal di tungod sa ilang katakos ug kaligdong kon dili tungod sa ilang kasuod ug natabang sa iyang kampanya.
* * *
- Latest
