Pagpahapsay sa trapiko

Daghan ang nakauyon sa akong sugyot nga tangtangon ang mga Pay Parking area daplin sa mga karsada nga hilabihan ka busy ang trapiko aron nga makatabang kini nga masulbad ang traffic congestion.

Ang akong ehemplo niini mao ang V. Gullas Street gikan sa eskina D. Jakosalem paingon na sa Carbon Market.

Pagka karon, gihimong Pay Parking area ang masigka daplin sa karsada niining maong karsada.

Akong isugyot ni Mayor Edgardo Labella nga usa lang ka kilid sa karsada ang himoong Pay Parking area sa mga sakyanan, aron nga moluag ang pag-agi sa mga motorista.

Pananglit anaa gihapon ang traffic congestion, hingpit na gyud nga idili ang pagparking sa mga sakyanan daplin sa mga karsada ug himoon na nga “Tow Away Zone.”

Siyaro og dili pa kini makapaluag sa dagan sa mga sakyanan. Akong nahibaw-an nga sa tibook tuig, mokolekta ang CITOM og mga P38 milyones gikan sa parking fees.

Pero, ang maong koleksyon kuhaon pa diha ang sweldo ug allowances sa mga traffic enforcers.

Gamay na lang ang mahibilin niini nga mora’g P8 milyones nga maoy maisip nga “net revenue” sa siyudad.

Pastilan, tungod ba lang sa P8 milyones isakripisyo nato ang tibuok siyudad nga grabe kaayo ang problema sa traffic?

Ang maayong buhaton sa mga opisyal sa dakbayan, dasigon nila ang mga tag-iya og bakanteng lote dinhi sa siyudad nga maghimo sila og Pay Parking area.

Unya, ang nagdumala og mga pribadong Pay Parking areas hatagan nila og gamay’ng incentive kay nakatabang man sa pagsulbad sa problema sa trapiko.  Dili ba maayo?

* * *

Mga senior citizens, basaha ni pag-ayo aron magiyahan mo sa pagkobra ninyo karong buntaga sa inyong P3,000 nga cash incentive gikan sa Cebu City government.

Una, kinahanglang kamo gyud maoy moadto sa mga distribution venues aron mokolekta sa inyong benepisyo, kay dili mo-entertain ang mga disbursing officers sa mga tawo nga gisugo sa mga senior citizens, bisan og duna pa kini “authorization” sa hingtungdan.

Unya, ang inyong mga ID dad-on gyud ha, ayaw ang photo copy kay dili mo makakuha. Unya, kadtong mga senior citizen nga namatay na, dili gayud kini makakuha sa benepisyo para kanila, bisan og ang ilang ngalan naa pa sa payrol.

Kon dili kamo makakobra karong adlawa, adto sa City Hall makakobra pa kamo hangtud sa Oktubre 4. Lapas sa maong adlaw, dili na ninyo makuha pa ang inyong cash assistance.

Busa, ayaw paglangay-langay, adto na sa mga distribution venues sa inyong tagsa-tagsa ka mga barangay.