EDITORYAL - Di kinahanglan gikan sa PBA

Dili maayo ang labok sa pambatong koponan sa Pilipinas  sa bag-ohay lang natapos nga FIBA Basketball World Cup didto sa China diin migawas nga mananaog sa ikaduhang higayon ang Espanya.

Human sa dili maayong performance didto miani og mga pagsaway  ang Gilas gikan sa mga basketball fans, ug bisan sa dili mga mahiligon sa basketball basta lang aron dunay ikaestorya.

Labaw sa tanan, daw nauwawan si Gilas coach Yeng Guiao kinsa mi-resign dayon sa posisyon human sa torneyo.

Ang mga pambato sa Gilas kadaghanan gikan sa professional basketball nga Philippine Basketball Association ug gisuportahan sa naturalized import nga si Andray Blatche nga karon murag luya na ang lihok.

Hinuon angay magpasalamat kang Blatche kay dako siya og natampo sa Gilas niadtong FIBA World Cup 2014.

Didto sa labing unang higayon subling nakita ang Bandila sa Pilipinas nga nakabalik og duwa sa maong torneyo human sa kapin 40 ka tuig.

Bisan wala sab sila adto nakasulod sa second round miani sila og pagdayeg dinhi ug sa abroad tungod sa lahi nga estilo sa duwa sa mga Pilipino ug labaw sa tanan mao pa kadtoy pagbalik sa Pilipinas sa FIBA World Cup.

Sa bag-ohay lang natapos nga torneyo didto sa China, dako kaayo ang pangagpas nga makasulod sila bisan sa second round, apan pakyas.

Plano karon nga adto sa Uropa mag-training ang sunod nga hulmahong Gilas team para sa FIBA World Cup 2023 diin usa ang Pilipinas sa tulo ka mga nasud nga mo-host kauban ang Indonesia ug Japan.

Isip usa sa mga hosts, otomatikong makaapil ang Gilas. Apan ang pangutana kun sa duha ka nangaging world cups may kalamboan kahang mapaabot?

Duna. Kini kun ang Samahang Basketbol ng Pilipinas di na manguha pag-usab og players gikan sa PBA. Dunay daghang mapilian gikan sa mga unibersidad ug Fil-Foreign players nga mahimong ekslusibong mamahimong sakop sa Gilas.

Nakita sa FIBA 2019 nga ang Gilas kuwang kaayo sila og praktis isip usa ka team.