CEBU, Philippines – Kapildihan maoy misugat sa bag-ong head coach sa Cebu nga si Noynoy Falcantos human ang Sharks gipakaging sa Pasig Sta. Lucia Realtors, 78-68 sa 2019 Maharlika Pilipinas Basketball League (MPBL) Lakan Cup niadtong Miyerkules sa gabii didto sa Strike Gymnasium sa Bacoor, Cavite.
Ubos sa pagtimon ni Falcantos, nindot unta ang gipakitang labok sa Sharks ugaling lang kay nahutdan sila og bala hinungdan nga nakatilaw sila sa ikatulo nilang sunod-sunod nga pilde ug ikawalo sa kinatibuk-an sud sa 12 ka duwa.
Nabiyaan og 14 puntos sa first half, apan ang Sharks nakahimo sa pagsikit, 64-69 sa nahibilin nga 4:35 sa duwa.
Apan sa kalit lang, si Josan Michael Nimes miposa og lima ka sunod-sunod nga puntos sa wala pa si Jeric Allen Teng milansang og duha ka free throws nga nakapaginhawa og lawom sa Realtors, 76-65 sa katapusang 2:02 sa aksiyon.
Si Teng maoy nakahimo sa labing dako nga kadaut sa Sharks human miharos og 20 puntos, 10 ka rebounds ug upat ka assists sa Pasig.
Dili sab mabangbang si Nimes nga mikolekta og 20 puntos, lima ka rebounds ug tulo ka assists alang sa Realtors nga nagpabilin sa ikaupat nga dapit sa North Division standing bitbit ang 9-3 record.
Si William McAloney maoy nangu sa upat ka Cebu players nga naka-double figures uban ang 21 puntos, gisundan ni Rhaffy Octobre ug Edrian Lao nga dunay 12 puntos matag usa, samtang si Kraniel Viloria dunay10 puntos sa Sharks nga nagtangag og 4-8 nga baraha.