Wala lang damha nakadawat ko og text message gikan kang Bro. Cedee Neo nga nipahibalo kanako nga motambong kuno ako sa pagahimoon nga 4th National Convention of the Philippine Catholic Exorcists didto sa University of Sto. Tomas Manila. Sa unang higayon akong himamaton si Fr. Jose Francisco Syquia ug uban pang mga exorcists sa Pilipinas nga motambong.
Sulod sa lima ka mga adlaw nga convention among pagahisgutan ang mga hilisgutan kalabot sa yawa ug mga demonyo. Butang nga ako mismo, wa magdahum nga moabot sa akong kinabuhi. Apan kay lagi gisangonan man, ato nalang kining dawaton uban ang panghinaut nga molahutay lang sa gihapon. Lisud ra baya gyud ning makig-asdang sa atong mga kaaway nga espirituhanon.
Adunay pipila ka mga punto nga akong nakat-onan gikan ning maong kasinatian. Una, anaa gyud diay ang gahum sa kangitngit. Ikaduha, ang bugtong paagi sa pagbuntog sa gahum sa kangitngit mao man ang paghupot og pagtuo nga ang Dios dili gyud motugot nga ang iyang banay sa katawhan mahiagom sa kalaglagan. Ikatulo, ang bugtong paagi sa pagbuntog sa yawa mao man ang pagtuo nga siya anaa, nagpahipi ug nangita lamang sa hustong higayon sa pag-atake. Ikaupat, ang gahum sa Dios gipaambit diha sa mga kahimanang Sakramental, busa matarong lamang nga gamiton nato sila uban ang tim-os nga debosyon. Ang eksorismo dili pagpayag sa gahum nga nahuptan sa eksorsista kondili di mahimong ang dautan mobuntog sa kahayag.