EDITORYAL - Front sa mga ilegalista

Gironda sa hiniusang pwersa sa tigpatuman sa balaod uban sa Department of Social Welfare and Development ang usa ka KTV bar diha sa Mango Avenue sa Dakbayan sa Sugbo diin 30 ka tawo apil ang 17 ka gidudahang mga menor de edad ang naluwas gikan sa prostitusyon.

Pila pa kaha ka mga susama niini nga matang sa balay patigayon dinhi sa Metro Cebu ang gihimong front sa mga illegal nga mga kalihokan sama niining prostitusyon?

Gani may mga establisamento pang gidudahang diha himuon ang mga transaksyon sa illegal nga drugas gikan sa mga balay-kahilayan hangtud na sa mga pension houses nNganong nisanay ug nabuhi man kining mga matanga sa illegal nga mga kalihokan? Unsa man diay ang papel sa mga tagdumala, kutob ra sa pagsigurong daghang customer silang maatiman o mahalin nga bino?

Wala ba diay sa mga kondisyon sa paghatag kanila sa ilang permits sama sa pagsigurong dili magamit sa mga dautang elemento ang ilang establsamento.

Angay tingaling dugangan pa ang mga rekisitos sa mga magkuha og business permits aron magtimaan sila kanunay nga dako ang posibilidad nga gamitong front sa mga ilegalista ang ilang establisamento nga wala silay kalibotan.

Ang tagdumala sa girondang KTV Bar nangangkon nga wala siya masayod nga gigamit sa maong mga bugaw ang ilang establisamento sa operasyon niini sa human trafficking.

Kun nahitabo kini kanila, dili layo nga dunay ubang mga establisamento usab sa siyudad o sa Metro Cebu nga gigamit sa mga ilegalista nga walay kasayoran ang mga nagdumala.

Mas labing maayo gani nga himuong regular ang pagbisita sa mga ahensya sa gobiyerno sa maong mga establisamento aron paghimo og inspeksyon.

Kadtong mga naluwas, biktima sa sirkumstansiya sa kinabuhi nga sila ray nasayod. Apan labing siguro, wala silay oportunidad nga makakuha og maayong panginabuhian mao nga sila kadtong sayon kaayong ilaron ug biktimahon sa mga human human-traffickers.