Hala bira!

Gihangop sa publiko ang kampanya sa CITOM nga pagpang-clamp sa mga sakyanan nga masakpang gipang-park lang daplin sa karsada kay ang mga tag-iya walay mga grahe sa ilang sakyanan.

Angay lang gyud kay dili maayo nga gamiton ang karsada nga grahe sa mga sakyanan.

Law-ay kaayo tan-awon nga ang gobiyerno migasto og dakong kantidad sa pagpalapad sa karsada, apan himoon lang grahe.

Ang uban gani nga mga mapahimuslanon sa higayon, butangan kanunay og mga misitas ang karsada atubangan sa ilang mga kabalayan aron masiguro nga sila ra gyud ang makaparking.

Resulta, dili na hinoon magamit ang karsada kay naa may mga misitas.  Daghan kaayo ang miawhag sa CITOM nga paspasan ang kampanya batok sa overnight parking sa mga karsada ug mihatag sila og mga dapit nga daghang sakyanan nga gigrahe lang sa karsada.

Saludohan nako ang mga higala ko sa CITOM nga gipangulohan ni Ric Barandog ug Major Andres Bayarcal.

Angay gyud nga ang clamping team ubanan og mga polis kay basin og may mga tag-iya sa sakyanan nga mangasuko ug maghimo’g kagubot.

Tambag lang nako sa mga dunay sakyanan, pangita og lugar nga kaparkingan sa inyong mga sakyanan nga dili makahasol sa uban. Ayaw gamita ang karsada nga maoy inyong grahe.

* * *

Karong adlawa, ang mga kawani sa kagamhanan sa Dakbayan sa Sugbo, manglimpyo sa Guadalupe River.

Nindot man kining pagpanglimpyo sa sapa, apan kining ilang gihimo dili gayud maoy sulbad sa paglunop ug pagbaha dinhi sa downtown area.

Bisan og makakuha pa sila og usa ka libo ka tonelada nga basura gikan sa Guadalupe River gikan sa Sitio Sandayong, Barangay Sapangdaku paingon na sa Ermita, walay epikto kini sa problema sa pagbaha.

Abi ninyo og ngano? Lawom ang sapa ang Guadalupe, ug habog kaayo og tampi nga dili gani moabot sa katunga ang tubig bisan og mag-unsa pa sa pagbunok ang uwan.

Ang angay’ng tagdon pag-una sa administrasyon ni Mayor Edgardo Labella mao kanang gitawag og Estero Parian, kanang sapa nga nagagikan sa Barangay Kamagayan ug nagsubay ilawom sa Junquera

Street, dayon lagbas sa Colon, ug anaa mag-agi sa ilawom sa Gaisano ug ubang mga tindahan.

Angay kini nga palawman ug palapdan ang maong gamay na kaayong sapa paingon sa Pier Tres.

Laing sapa nga angay’ng palapdan ug palawman base sa orihinal niini nga gidak-on, mao ang sapa nga gikan sa Barangay Day-as ug milagbas sa Sikatuna Street paingon na sa sapa sa Barangay T. Padilla.

Kining maong sapa ang kanunay’ng mosugwak ug maoy makapalunop sa eskina Bonifacio Street ug Sikatuna dapit sa Barangay Parian.

Ang mga nakapagamay sa sapa, sama nianang nagnegosyo og mga puthaw, angay’ng himoan og aksyon.