Wala motagam!

Bisan pa man sa hugot nga crackdown sa kagamhanan batok sa tanang mga investment schemes nga tataw na kaayong scam apan daghan gihapon kaayo ang morisgo sa pagbubo sa ilang kwarta sa pamasin nga modako.

Kini ilabi na kun madoble ang kwarta sulod lang sa pipila ka adlaw sama nalang sa kompaniyang nagpaila nga Phoenix Trading sa social media.

Double your money ang ilang pagdani sa mga tawo pinaagi lang sa social media, ang tanang komunikasyon sa messenger ipaagi samtang binayranay sa mga money transfer and remittance centers.

Pipila ka mga biktima ang midangop sa Regional Anti Cybercrime Unit sa Philippne National Police human sila nabiktima.

Usa kanila ang misugilon nga naengganyo siya nga mo invest kay nakakita lagi siya sa mga comments sa social media nga positibo kaayo.

Gani siya mismo naka experience dihang miapil tungod kay naka payout man siya og kalima.

Una usa ka libo hangtod midoble ug mitubo og dako dako hangtod nga misalig na gyud siya tungod kay sulod lang sa walo ka adlaw kwarta na.

Ilabi na dihang nag promo kini og upat ka adlaw nga madoble ang kwarta hinungdan nga nang loan ang mga biktima aron ibubo sa investment.

Kataposan nalang diay kadto kay wala naman nagparamdam ang tawo nga ka transaction sa social media.

Didto na sila nahigmata nga na scam na sila og nawagtang ang hinaguan nga kwarta.

Usa sa mga biktima nailad na kaniadto sa organico busa nanimpalad sa laing kompaniya nga labaw pa diayng mangingilad.

Lisod kaayo i trace ang kompaniya nga ni exist lang sa social media kay katumbas kini sa wala.

Igo nalang sila sa pagreklamo kay ang realidad dili naman gyud mabalik ang ilang kwarta. Busa magsilbi unta kining leksyon nga angayang kat-onan sa tanan.