EDITORYAL - Unsa kagamay ang “ginagmay?”

Si Presidente Duterte namahayag nga “ok lang” kung modawat og mga pahalipay o gasa ang kapolisan basta ginagmay lang o may limitasyon.

Apan negatibo ang pagtan-aw niini sa publiko mao nga husto ang baruganan ni PNP Director General Oscar Albayalde Jr. nga dili kini maayo ug supak kini sa ilang gipanumpaang tahas. Ang ingon niini nga mga pamahayag gikan sa presidente maoy sagad abusaran. Nahitabo na kini sa unang tuig sa paglingkod ni Duterte sa dihang gipangusgan ang kampanya kontra illegal nga drugas.

Daghan ang mga nakalas kay nanukol sa mga operatiba, apan daghan ang nikwestyon kun unsa ka tinuod ang pangangkon ug pasangil sa mga polis kay lahi man ang gitug-an sa mga testigo ug sa mga kabanay sa mga drug personalities.

Ang resulta, naabusaran gyud ang kampanya kay dunay mga polis nga napamatud-ang nangwarta gamit ang kampanya, pila kanila nangataktak na sa serbisyo. Ug duna sab silay mga sakop nga drug ug illegal gambling protectors.

Ubos sa balaod, ang mga public officials ug mga kawani niini gidid-an pagpangayo o pagdawat direkta o dili direkta og bisan unsang gasa o pahalipay, suhol, pabor, kalingawan, utang o bisan unsang dunay bili gikan ni bisan kinsa tungod lamang sa pagbuhat sa ilang opisyal nga tahas (trabaho). Anugon kun tungod lang niini dunay mga polis nga matintal nasab sa kwarta. Nagkinto naman unta sila karon pagbuhat sa ilang tahas ug hinayhinay ng nabalik ang pagsalig sa katawhan.

Ang eksplinasyon ni Presidential Spokesman Salvador Panelo sa pamahayag sa pangulo nga mahimong modawat ang mga polis basta ginagmay lang basta dili “excessive” o sobra-sobra ug walay baylo.

Ang pangutana, pila man ning “ginagmay” ug “excessive?” Dili ba kaha matintal ang mga polis kun matunolan sila og dako-dakong kantidad unya mangayo sab og “gamay” nga pabor ang naghatag?

Bisan si Duterte namahayag kaniadto nga kinahanglang patas-an ang sweldo sa mga polis kay matintal sila sa kwarta gikan sa mga ilegalista.