Unahon nato kining balita kabahin sa cash assistance sa mga senior citizens dinhi sa dakbayan sa Sugbo kay daghan kaayo ang nagpaabot niini.
Karong Septiyembre na tingali kamo makadawat sa inyong cash assistance ky hangtud karon wala pay supplemental budget nga naduso ang executive department ngadto sa City Council.
Gitug-anan ko ni kanhi konsehal Joey Daluz nga posible nga dunganon nila paghatag ang cash assistance para sa buwan sa Hulyo, Agosto ug sa Septiyembre.
Gituyo gyud nako pag-follow up kining mao nga isyu kay pwerteng daghana sa mga senior citizens ang mangutana sa media, ang uban manawag gyud gani nako, ug mangutana kanus-a sila makakobra.
Para nako, maghuwat lang gyud unta ang mga senior citizens kon kanus-a ihatag kay aron sab modako ang kantidad nga ilang madawat.
Magpasalamat sab mo ni kanhi konsehal Daluz kay mao kini ang gisaligan sa mayor kabahin sa mga financial matters.
Karong sunod semana pa tingali makaduso sa City Council og supplemental budget nga P455 million para sa nga seniors. Daghan pa nga nga technicalities nga angay’ng sundon aron nga maaprobahan ang giduso nga budget. Maghuwat lang gyud mo kay unsaon nga ang budget diay nga gitagana atol sa administrasyon ni kanhi mayor Tomas Osmeña, kutob ra man diay kuno kaniadtong Hunyo.
* * *
Mora’g pwerte na gyud nga bisiha ni Mayor Edgardo Labella karong mga adlawa, ilabi na nga nahimo siya nga chairman sa League of Cities of the Philippines.
Tinuod, dako nato nga garbo nga ang atong mayor sa dakbayan sa Sugbo maoy labing taas nga opisyal sa liga sa nga city mayors sa tibuok nasud.
Apan nabalaka ko nga tungod sa kabisi na ni Mayor Labella sa nga gimbuhaton nga ang uban, gawas na sa dakbaayan sa Sugbo, ang mga kalihokan dinhi sa siyudad dili na hinuon niya maatiman.
Nakabantay ko nga usahay si Mayor Labella makalimot na gani pagtuman sa uban niya nga mga gipanulti, tingali tungod sa kabisi sa trabaho.
* * *
Nalipay ko kay gitagad na sa mga sakop sa City Council nga gipangulohan ni Vice Mayor Mike Rama ang problema sa grabeng kabaho sa daplin sa sapa sa Barangay Kalunasan.
Ang dili masingo nga baho giingon nga gikan kini sa mga hugaw sa pansayan sa duha ka dagkong bilanggoan nga anaa sa bukid sa Barangay Kalunasan.
Angay gyud kining dalion sa pagsulbad kay dili sayon ang kahimtang sa mga lumolupyo nga nag-antos sa dili masingo nga baho gikan sa hugaw sa mga piniriso.