Political Will

Kun ipakita ni Mayor Edgardo Labella nga duna siya’y ‘political will’ sa pagpatuman sa balaod ug moresulta sa hapsay nga siyudad, ug maayo ang pagkadumala sa ekonomiya, lisud na siya nga mapilde pa sa eleksyon.

Dili ko makapugong pagpahiyom sa matag higayon nga mosulti si Labella nga wala siya’y pilion, bisan og ang iya pa kuno nga mga dumadapig sa politika kun makahimo og salaod, iya gyud nga silotan.

Ang tinuod, dili gyud ikapasigarbo ang dakbayan sa Sugbo tungod kay makita nimo nga nagkagubot lang ang atong mga aseras, dinhi sa siyudad ug ilabi na gyud diha sa kabarangayan.

Kun moadto ka sa Pasil Fish Market nga nahimutang sa Barangay Suba, Dakbayan sa Sugbo, pastilang samoka kay ang karsada giukopar sa mga tawo nga ang uban anaa pa nagbutang og tindahan ug higdaanan.

Kay kaalyado man sa mayor ang kapitan karon sa Barangay Suba, sayon ra alang kaniya ang paghunghong niini nga usbon ang maong sitwasyon aron nga hapsay ang barangay.

Ambot kun kinsa kaha nga opisyal sa kabarangayan ang makapahapsay sa ilang barangay nga ang aseras dili na gyud unta ipagamit sa personal nga katuyoan, sama nga butangan og tindahan.

Daghan usab sa mga opisyal sa barangay ang nagpalingiw-lingiw lang sa mga nagkatag nga basura, ug nalipay ko nga si Grace Luardo, ang gibalik nga pangulo sa CESET (City Environment, Sanitation and Enforcement Team) mopasaka gyud og kaso sa mga opisyal sa barangay nga walay gihimo aron limpyo ang ilang dapit.

Unya, kun isyuhan gani og Citation Ticket ang usa ka opisyal sa barangay nga wala makatuman sa balaod, kinahanglang ikiha gyud siya sa korte kun dili niya bayran ang iyang multa.

Sa ingon nga paagi, maleksyon ang mga opisyal sa barangay ug dili kay ibaliwala ra ang Citation Ticket nga giisyu kanila.

* * *

Daghan ang nakasaway sa gihimo sa CESET nga kadtong tawo nga gisuholan nila’g sardinas, ilang gipakanaog sa sapa aron manguha sa daghang basura nga gipanglabay ra sa sapa sa Barangay Tejero.

Matud ni Grace Luardo, nga gihatagan nila og tag 65 ka latang sardinas ang kada usa sa 12 ka tawo nga ilang gipatabang pagpalimpyo sa sapa.

Anaa ra mangatulog sa aseras ang maong mga tawo ug ilang gihangyo nga motabang sa pagpanglimpyo.

Gidayeg sa katawhan ang maong mga tawo, apan tambag sa mga netizens nga pwede ra tingali unta nga pasakyon og gakit o baruto ba ang maong mga tawo aron dili na kinahanglan sila nga moubog sa hugaw nga tubig.

Husto man pud ang tambag ug maayong sundon kini sa CESET sa sunod nilang pagpanglimpyo. Unya, mas nindot nga kuhaon nila nga Job Order workers ang maong mga tawo, dili kay hatagan lang og sardinas.