Kausaban sa polisiya

Tungod kay bag-o ang mga napili nga opisyal sa mga lokal nga kagamhanan sa pipila ka mga dapit sa Sugbo nakita napud nato karon ang mga bagong polisiya nga giatuman sa maong mga dapit.

Sa Dakbayan sa Sugbo nga ubos na karon sa pamunoan ni Mayor Edgardo Labella mao nay polisiya sa iyang pang gobyerno ang pag impas o paghurot og bayad sa utang sa dakbayan sa pagmugna niini sa South Reclamation Project nga gitawag na karon og South Road Properties (SRP).

Sa panahon ni kanhi Mayor Tomas Osmeña wala niya bayari og hurot ang utang sa paghimo sa SRP bisan pa man og may salapi ang dakbayan nga ikabayad niini tungod kay ganahan gyod lang siya nga tagi-tagihon ang pagbayad sa utang.

Gusto usab ni Mayor Edgardo Labella nga adto na sa gawas sa dabayan sa Sugbo ilabay ang mga basura ug wala nay tugotan nga mga magpapatigayon nga makapadagan og negosyo nga labayanan og basura sulod sa dakbayan sa Sugbo. Sukwahi kini sa gobyerno ni Osmena nga gitugotan ang landfill nga matukod aron dinhi ilabay ang basura sa dakbyan.

Sa dakbayan sa Talisay nga gidumala karon sa bagong Mayor nga si Samsam Gullas gipatuman ang “No helmet, No Ride policy”. Buot ipasabot dakupon sa Talisay ang mga magsakay og motorsiklo nga dili magsulob og helmet. Gitun-an usab niini karon ang pagdili sa mga patigayon sa dakbayan sa pag gamit og plastik.

Panahon sa pamunoan sa iyang apohan nga si kanhi Mayor ug karon kongresista Eduardo Gullas wala kining maong mga polisiya.

Sa lalawigan sa Sugbo, ibalik sa bag-ong napili nga Gobernadora Gwendolyn Garcia ang pag outsource sa mga kawani sa tanang District Hospital. Panahon sa kanhi Gobernador ug karon Bise Gobernador Hilario Davide III kawani gayod sa kapitolyo ang gipatrabaho sa mga district hospitals.

Ato lang obserbahan ug tanawon epektibo ba ug makaayo ba sa katawhan ang nahisgotang mga polisiya.