Dear Atty. Divine:
Ang kompaniya sa akong bana medyo nagkalisud na kay sige na og ka delay ang ilang sweldo ug hinay na sad kaayo ang ilang negosyo. Matud sa HR nga posibleng manira na gyud sila sa hingpit karong tuiga. Napulo ka tuig na nga nagtrabaho sa maong company ang akong bana ug karon ra ni nahitabo nga na-delayed na ang ilang sweldo. Kun pananglit manira na sa hingpit ang ilang kompaniya duna ba silay madawat nga separation pay? Daghang salamat.
Mel
* * *
Dear Mel,
Basi sa Art. 283 sa atong Labor Code, ang kompaniya mamahimong manaktak og trabahante kun naalkanse na kini or hingpit nang nanira ang ilang operasyon. Apan obligado gihapon ang kompaniya o employer sa paghatag og separation pay sa ilang empleyado nga apektado. Equivalent og one month og dili mominus sa half month per year of service ang ilang madawat nga separation pay. Sa ato pa, kun manira ang ilang company then makadawat gyud og separation pay ang imong bana sa iyang napulo ka tuig nga pagtrabaho sa company. Thanks and God bless.
Atty. Divine
* * *
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.