Ekonomikanhong sukaranan

Dili tuyoon nga tinguha gyud natong mga tawo ang economic security. Mao bitaw nga maningkamot ta nga magpundo taman sa ginhawa, maningkamot taman sa ginhawa hangtud na gani ang gabii himuon natong adlaw aron makakita kita sa atong gitinguhang tingusbawan.

Mao nga samtang bata pa kita maningkamot kita hangtud nga inig ka tiguwang nato mamahimong dili na nuon ta ma ka enjoy sa atong gitinguha tungod kay nahimo kitang maluyahon sanglit ang atong lawas naningil naman kanato.

Ang labing sakit pa gyud niini mao nga naningkamot ta sa uban apan sila nga atong gitinguhaan ang wala gani pagtagad sa atong paningkamot. Sa laktod nga pagkasulti, importante ka nila tungod kay ikaw mapuslanon pa. Apan inig abot sa panahon nga kita dili na mapuslan mahimong kita isalibay na lang ingon nga hugaw o layang dahon aron isugnod ug dauban.

Bisan asa anaa gyud ang ekonomiya. Bisan gani ang relihiyon anaa gihapon ang ekonomiya. Dili tuyoon nga kada kihol atong gihatagan og katugbang nga presyo. Matag pagbati usahay ato mang gihatagan og igong bayad sama sa paghatag kanila sa kahigayonan nga makatilaw sa hinanaling kaharuhay.

Kaharuhay nga mahimong maangkon lamang kun maantigo ka sa arte sa parayganay. Mao kini ang ekonomikanhong sukaranan sa tanang panlimbasog kay bisan gani pahiyom nga dili tinuod mahimong mahatagan man og presyo subay sa gilatid sa kadaghanan.

Balik diha sa pagtabang. Ayaw ihurot ang tanan. Tinuod anaa ang Diosnong pag-amoma apan sakit palandungon nga usahay kita makabati nga kita dili na magmalipayon labina kun diha sa imong pagpaningkamot nga mamahimong matinud-anon ang imong gibuhatan sa ingon usa diay ka dakong bakakon.

Daghan ang nagpakabao karong panahona apan ayaw kabalaka ug kahadlok kay bisan pa man kun ekonomikanhon ang ilang pagtagad kanimo mas ekonomikanhon ang ilang kinaiya kay kanimo nga nagpakatawo. Mas maayo pa tingali nga makabaton kita og matinud-anong kaaway kaysa maluibon ug tigpakaaron ingnon nga higala.