Bag-o nga mga sulbad
Pulos bag-o ang mga mayor sa upat ka labing dako nga dakbayan sa Metro Cebu sugod sa udtong tutok karong Hunyo 30.
Masukod dayon ang ilang kaandam ug katakos pagsulbad sa labing batakan ug dinalian nga mga suliran sa mga Sugbuanon.
Kay gideklarar na man sa PAGASA ang pagsugod sa tinguwan, ang hulga sa baha mao ang kinahanglan dayon nila nga sagubangon. Uwahi na ang bisan unsa nilang himuon tungod sa pagpasagad sa gisundan nilang mga pamunoan.
Apan mas maayo na lang kay sa wa na lang gyud silay buhaton.
* * *
Managsama nga seryuso ang problema sa baha sa mga dakbayan sa Sugbo, Mandaue, Lapu-Lapu ug Talisay. Sa kaso sa tulo ka dakbayan sa mainland, nagsumpay ra ang ilang mga problema.
Hinaot nga magkasabot na silang Cebu City Mayor-elect Edgar Labella, Mandaue City Mayor-elect Jonas Cortes, Lapu-Lapu City Mayor-elect Ahong Chan ug Talisay City Mayor-elect Samsam Gullas nga di na sila mahimo nga mag-iyahay.
Di lang sa baha. Kun dili hasta na sa basura ug trapiko. Tingali masubli sa ilang mga pamunoan ang panginahanglan sa pagtukod sa Metro Cebu Development Authority.
* * *
Hinaot sab nga ang bag-ong mga mayor maghupot na sa mithi nga wa ipasundayag sa ilang mga gisundan—politikanhon nga kaisog.
Hinaot nga ila na gyong higpit nga mapatuman ang gisigehan lang og yatak nga mga lagda sa tarung nga paghipos sa mga basura.
Ug mahawanan na nila ang mga suba di lang sa mga barung-barong sa kabos nga mga pamilya kon dili ug labi na sa higante nga mga istruktura sa adunahan nga mga negosyante.
* * *
Hinaot sab nga di na sila magtihik-tihik og gasto sa kuwarta sa gobyerno alang sa komprehensibo nga drainage system, bahala na kon ang mga kanal ilawom sa yuta di kabutangan sa ilang mga ngan ug nawong.
Ug hinaot nga mohunong na sila sa pagbalik-balik sa pakyas nga mga sulbad sa baha ug magpaabot og lahi nga sangpotanan.
Pananglitan, inay magsige og lubong og higanteng mga imburnal nga way klarong lutsanan, tukuron na nila ang dams sa bukirang mga barangay ug kubkubon na ang higanteng mga lungag nga kapundohan sa uwan sa labing ubos nga mga luna sa patag.
* * *
- Latest
