Paglikoy tungod sa China
Isip labing una nga opisyal sa gobyerno nga nipahibawo nga nabanggaan ang Pilipinhon nga barkong pangisdaan nga nag-angkorahe sa Recto Bank sa West Philippine Sea, si Defense Secretary Delfin Lorenzana sab ang labing una nga nikondenar sa pagbiya sa barko sa China sa 22 ka mga tripulante sa nalunod nga F/B Gem-Ver.
Nisunod pagpasabot ang Western Command nga maoy gitahasan sa Armadong Kusog sa Pilipinas pagbantay sa WPS nga di katuohan nga aksidente ang bangga kay nibiya ang barko sa China inay tabangan ang nameligro nga Pilipinhon nga mga tripulante.
* * *
Ang labing una nga direkta nga pasangil nga gituyo sa barko sa China, ang Yuemaobinyu 42212, giluwatan sa hepe sa Philippine Navy nga si Vice Admiral Robert Empedrad kinsa nisalikway sa pangangkon sa Chinese Foreign Ministry nga normal nga aksidente ang panagbangga.
Si Presidential Spokesperson Salvador Panelo niawhag sa China sa pagsilot sa mga tripulante sa Yuemaobinyu 42212, nipasidaan nga mahimong putlon sa Pilipinas ang iyang diplomatikanhong relasyon uban sa China ug niangkon nga nasuko pag-ayo si Presidente Rodrigo Duterte sa panghitabo (niangkon hinuon nga wa pa sila magkasulti sa presidente).
* * *
Unom ka adlaw human gipahibawo sa panghitabo, nitingog sa labing unang higayon si Presidente Duterte. Gihulagway niya ang insidente nga bangga sa mga barko, kasarangan rang aksidente sa dagat.
Si Panelo nipadayag og pagduda tinuyo bang pagbangga.
Si Lorenzana niangkon nga mahimong aksidente ang nahitabo. Si Agriculture Secretary Manny Pinol nikutlo sa kusinero sa Gem-Ver nga duha ra ka suga ang nagsiga busa posibleng wa kakita ang barko sa China nila.
* * *
Apan ang tag-iya ug ubang tripulante niinsistir nga gibanggaan sila.
Nagmahay na gani nga inay tabangan gidudahan na hinuon sa mga opisyal sa gobyerno. Nagdumili ang kapitan nga si Junel Insigne sa pakigtagbo sa presidente.
Napu ka adlaw human sa katalagman, ang mga mangingisda way nadawat nga hinabang gikan sa lokal ug nasudnong gobyerno. Hangtod nga niabot sa ilang lungsod sa San Jose, Occidental Mindoro si Piñol.
Gibarikadahan sa mga polis ang bay ni Insigne samtang nagsulti sila sa sud. Sa ilang pag-atubang sa media, niingon si Insigne nga mahimong aksidente ang bangga. Ug gi-apud-apod ni Piñol ang hinabang sa mga mangingisda.
* * *
- Latest
