China nagduda sa bersiyon nila
ARANGKADA - Leo Lastimosa (Banat) - June 18, 2019 - 12:00am

Wa lang ipanghimakak sa China nga ilang barko ang nakabangga ug nakapalunod sa F/B Gem-Vir 1 sa Recto Bank niadtong tungang gabii sa Hunyo 9, niinsistir pa gyud nga ang ilang mga mangingisda nga sakay sa fishing boat Yuemaobinyu 42212 mao ang tinuod nga mga biktima.

Matud sa Chinese Embassy sa Manila ang Yuemaobinyu 42212 igo lang nagpundo dihang kalit nga gi-atake sa pito ngadto sa walo ka fishing boats.

Sa ilang paglikay, nasaghiran sa Yuemaobinyu 42212 ang Gem-Vir 1 nga naigo sa luyo ug igo lang nga nitakilid.

* * *

Nipasabot ang Chinese Embassy nga luwason unta sa mga tripulante sa Yuemaobinyu 42212 ang mga tripulante sa Gem-Vir 1 apan nahadlok sila nga atakehon sa duhang Pilipinhon nga fishing boats. Nibiya lang hinuon sila dihang nakit-an nga giluwas na sa ubang Pilipinhon nga fishing boats ang mga tripulante sa Gem-Vir 1.

Apan hasta ang embahada sa China mora og nagduda sa kamatinud-anon sa ilang bersiyon.

Kay human unang gimantala sa ilang Facebook page sa Biyernes sa gabii, gitangtang sud sa pila ka oras ug gibalik pagka Sabado na sa udto.

* * *

Sa ilang bahin, ang kadagkoan sa Malakanyang nga klarong nahasol sa pagpakahilom ni Presidente Rodrigo Duterte sa isyu nidalidali pagpahibawo nga may dinaliang tigom sa gabinete nga motuki sa insidente sa alas-3 sa hapon niadtong Domingo.

Tingali mao ‘to ang ilang paagi sa pagpasalig sa katawhan nga wa mangiyugpos ang presidente kun dili gihatagan og dakong importansiya ang nahiagoman sa 22 ka tripulante sa Gem-Vir 1.

Apan nahilaw ang Palasyo dihang kalit nga gikanselar ang tigom.

* * *

Nisunod ang katin-awan sa Malakanyang nga di katambong ang presidente sa tigom sa gabinete kay may lain siyang lakaw.

Di diay tingali ingon ana kadinalian ug kamahinungdanon ang pagpanghasi sa China alang niya.

Dayon gipahibawo sa Malakanyang nga makigtagbo ang presidente sa kapitan ug kusinero sa Gem-Vir 1 nga nakakita sa aktuwal nga bangga.

Apan dihang nagdumili ang kapitan sa pakigtagbo sa presidente, gidalidali pagbakwi sa Palasyo ang pahibawo sa tigom, wa diay mangimbitar ang presidente ni bisan kinsa sa pagpakigtagbo niya.

Nagpaabot pa tingali si Presidente Duterte sa tukmang higayon pagkumbinser nato sa bersiyon sa China.

* * *

leo_lastimosa@abs-cbn.com

CHINESE EMBASSY
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with