Kinsa man gud tawon ang wala mangandoy og kagawasan nga mao man gyud kini gitinguha sa tanan nga matagamtaman.
Labi na gyud ang kagawasan gikan sa kalisod hinungdan nga ang uban mosugal nalang sa bisan unsa nga pangita, negosyo ug uban pa aron makahaw-as sa kalisod.
Sama nalang niining mga investment scheme karon nga wala’g tuo ang paggimaw uban sa pasalig nga motubo ang kwarta dali nga panahon.
Apan mag unsa naman lang kadtong mga naka invest og dakong kantidad nga gigukod naman sa gobiyerno ang mga kwestyonableng investment company.
Ang Kabus Padatuon o KAPA, Organico ug ubang mga kompaniya ang sunod sunod nga gironda sa mga otoridad.
Ang Kapa sa Compostela nga una nang gisunog sa mga tulisan giadto sa NBI ug ang Organico sa Cebu City mao usay gironda sa CIDG.
Wala nay mga tawo o staff sa naasoy’ng mga company pag-abot sa mga otoridad, ang mga kahimanan sama sa computer ug mga papeles ang nakuha sa mga otoridad.
Dako kaayo kini og epekto sa mga nibubo sa ilang puhonan kay posibleng dili na gyud mabalik kanila kun dili na ka operate og balik.
Matod sa opisyal sa Securities and Exchange Commission (SEC) nga miuban sa raid nga scam ang gihimo sa naasoy’ng mga kompaniya.
Bisan og rehistrado kini sa SEC apan wala kini permiso sa ilang gihimong pagpangolekta og kwarta gikan sa mga tawo nga ilang nabiktima.
Bisan pa og walay nadawat nga reklamo gikan sa mga investors apan gikinahanglan nang moaksyon ang gobiyerno isip intervention sa mas dako pa unya nga problema.
Kadtong mga investors nga mahimo kunong moduso og laing kaso batok sa nagdumala sa naasoy’ng mga investment firms aron mabawi ang ilang kwarta.
Apan suntok sa buwan kini kay dili naman makalihok ang mga kompaniya tungod sa aksyon sa gobiyerno.
Mahulog nalang nga malubong sa kalimot ang kwarta nga gibubo sa mga tawo kay kinsa naman lang ang ilang paninglan.
Sa kaso sa Kapa sa Compostela nga nasunog ug natulis diin minilyon ka pesos ang nakuha, dili na usab sila makapadayon dili na gyud pa mabalik sa mga tawo ang ilang gi-donate.
Atangan nalang nato asa mosangpot kining tanan.
Inay makaangkon og kagawasan sa kalisod, magpabiling magapos na hinoon sa problema tungod sa ilang pagkabiktima.