Pagtudlo og OSCA Head
SENIOR CITIZEN - Antolin dela Serna (Banat) - May 24, 2019 - 12:00am

Gikan sa pagkapupos sa termino ni Doming Chaves isip OSCA Head sa dakbayan sa Sugbo sa miaging December sa miaging tuiga, walay gipuli nga OSCA head. Sa ato pa, sulod sa miaging lima ka buwan, wala kitay OSCA head sa atong dakbayan.  Of course, alang kanatong mga senior citizen medyo nabakikaw ang atong kahimtang.  Dunay haw-ang. Apan alang sa administrasyon ni Osmeña normal ang tanan. Alang kanila, magpabilin man ang kahugpongan sa mga senior citizen  bisan kon walay OSCA head.

Apan, atong namatikdan nga wala kitay nakita nga mga dagkung kalihokan ang mga senior citizen sa dakbayan, gawas sa paghuwat kanus-a manghatag sa binuwan nga cash assistance gikan sa city hall. Mao na lang kini ang atong activity. Ug lagmit mao usab kini ang bugtong kalihokan sa mga chapter associations sa nagkalainlaing barangay sa dakbayan.

Nahinumdom si Doming Chaves nga sa iyang panahon, iyang naduaw ang tanang barangay ning dakbayan, lakip ang mga mountain barangays subay sa programa pagdala sa buhatan sa OSCA duol ngadto sa mga barangay.

Usa lamang kadto sa regular nga kalihokan sa mga senior citizen. Apan, karon, gumikan sa pagka-walay OSCA head, wala nay napasiugdahan nga kalihokan.

Hinumdom sad ko nga dihay core group gilangkoban sa pipila ka aktibong mga sakop sa pipila ka chapter associations sa dakbayan nga regular kaming magtapok sa buhatan ni Doming, magbayloay lang sa mga hunahuna bahin sa kalihokan sa mga senior citizen.

Apan, tapus sa pag-assume sa Osmeña administration, nahanaw ang maong core group, nabungkag. In my case pananglitan, wa  na sad ko makaduaw sa buhatan sa OSCA sulod sa tulo ka tuig nga termino ni Osmeña.

Karon,  among giplanohan nga banhawon ang maong pundok, ug among gipanghinaot nga hatagan sa unang mga pagtagad sa Labella-Rama  administration ang pagtudlo og OSCA head.

Ug unta hinayunon na kadtong mga plano kanhi pagbutang og senior citizen center dinhi sa sentro sa dakbayan tungod kay kadtong atua sa SRP, layo kaayo ug dili conveniently accessible sa mga senior citizen.

Diha usay mga plano pagtukod sa Federation of Senior Citizen Associations of Cebu City aron mabug-os ang tingog sa mga senior citizen ning dakbayan. Kay sa pagkakaron gud  nag-iyahay man ta. 

Unya, naduhigan sad sa kagaw sa politika.

Gawas niini, wa na man ta makadungog sa FSCAP kon Federation of Senior Citizen Associations of the Philippines. So, dinhi sa ato, let’s get united, magtukod kitag kaugalingon nga federasyon, ug ato kining lig-unon.

Sa ato nang gibalikbalik paghisgot dinhi, ang AARP kon American Association of Retired Persons nga gisakopan sa kapin 42 milyones ka senior citizens ug mga retirees, giisip nga usa sa labing influential nga pundok sa America. Sa ato pa, tungod kay sila nagkahiusa, dili ma-ignored ang ilang tingog. Mapugos gyud og paminaw kanila ang gobyerno sa America.

Mahimo kaayo ni nato dinhi sa atong dakbayan kon magkahiusa lamang kita, diin ang maong panaghiusa mamahimo natong kusog pagbulig sa pagpalambo sa dakbayan. 

Mag-usa ta. Ug malipay  niini sila ni Mayor-elect Edgar Labella ug Vice Mayor- elect Mike Rama, tungod kay duol sa ilang kasingkasing ang mga senior citizens ning dakbayan.

OSCA HEAD
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with