Mga matang sa Demonyo

Usa ka tawo ang nangutana kanako ug sa tanang mga pangutana nangutana pa gyud siya og mahitungod sa demonyo. Mao nga ang nahitabo mao nga ako na lang pud siyang gisuwayan og pasabot ginamit ang libro ug pagtuon ni Padre Cabading usa ka Dominikano sa Artsidyosesis sa Manila. Mao nga ako lang usab kining gigamit ingon nga material dinhi bisan gani diay ang mga demonyo dunay nagkadaiyang klase. Matud pa ni Padre Winston Cabading sa iyang librro: Catholic Handbook of Prayers for Spiritual Liberation and Exorcisms with a Redactor’s Notes pahina 350-351 ang mosunod mao ang mga matang sa demonyo:

1. Demoni Aperti (Abling mga Demonyo) Daw sa normal lang ang kahimtang sa biktima. Buka ang iyang mga mata. Sa atong tan-aw mura og nag-antos lang siya sa usa ka psychological ug psychiatric nga balatian. Kasagaran ang biktima tabian kaayo ug himoon niyang ilaron ang eksorsista mao nga ang eksorsista dili maayo nga magpadala sa maong lingla. Mahimo siyang pintas ug gani, dunay kasilag sa iyang mga mata. Kun ang biktima mamahimong pintas gikinahanglan ang tabang sa uban aron mokupot kaniya. Aversion to sacred objects kun ang kalagot sa bisan unsang sagrado ang timailhan nga dunay possession nga nahitabo.

2. Demoni A Chiudi (Close Demons) Panahon sa Eksorsismo ang maong demonyo mamahimong magpiyong lamang. Kun imong bukhon ang mga mata niini bugtong puti na lamang ang makita. Ang iyang tumong mao ang pagtago sa iyang presensiya. Dili motingog ug daw way nahitabo lamang sa iyang kahimtang. Sa laing bahin ang maong demonyo mapalagpot lamang pinaagi sa padayon nga pag-ampo sa mga pag-ampo sa eksorsismo.

3. Demoni Muti (Amang nga Demonyo) Kasagaran panahon sa Eksorsismo ma diagnostic man o full blown ang  biktima magpakahilom lamang. Nagpasabot kini nga gamhanan ang maong demonyo apan bisan pa man kun siya gamhanan kaayo ang pagbalikbalik nga eksorsismo makapaluya ug sa kadugayan makapalagpot nila.

4. Demoni Oculti/Abiditi (Nagtago nga mga Demonyo) Diha sa kinabuhi sa tawo mamahimong anaa na sila ug nagpabilin sud sa taas na nga panahon. Ang timailhan nga anaa sila mao man ang bisan kinsa nga anaa sa ilang palibot ang makasinati sa gitawag natong mga preternatural occurrences labina kun anaa sila duol sa maong tawo.

Daw sa nakugang siya sa maong classifications apan ako siyang giingnan nga ayaw lang gyud og ka focus sa demonyo kay dunay mas labaw pa sa demonyo ug kana mao ang Ginoo. Ang Eksorsismo dili mahitungod sa horror movies nga nakita nato apan sa gugma sa Dios nga nagmadaugon batok sa gahum sa kangitngit. Nagdali siyang nidagan palayo dili tungod kay nahadlok siya kondili motan-aw pa diay siya og Maledicto, Kwaresma Eerie ingon nga movie marathon.

Samtang ako kontento na kaayo sa salida ni Erik Matti nga Seklusyon. Dunay nisangpit kay dunay tabangonon ug sa akong pag-adto nagkirigkirig si Dodong. Sa wala pa himoa ang pray over ako siyang giingnan kun di ba siya mokuyog kun moadto ko sa internetan aron moduwa og mobile legends. Naulian man.