Abuso
LINTUNGANAY - Fred P. Languido (Banat) - April 28, 2019 - 12:00am

Mikatap ron sa social media ang video sa giingong operasyon sa kapolisan sa Talamban diin ilang gikulata ang ilang dinakpan.

Sa video makita ang mga armadong lalaki, ang uban nagbitbit og tag-as nga armas, nga misulod sa usa ka pinuy-anan.

Ang mga armadong lalaki mibunlot sa usa ka lalaki ug mikulata niya. Samtang dunay kauban sa mga armado ang nangutingkay sa mga gamit ug dunay gisulod sa iyang bulsa.

Di maklaro sa video unsa ang gipunit sa lalaki og gisulod sa iyang bulsa. Dili sab matino sa video tinuod bang mga pulis ang mga armado sanglit wala man silay uniporme.

Apan si Mayor Tomas Osmeña sa iyang post sa Facebook namasangil nga ang maong mga armadong lalaki mga sakop sa Talamban Police Station nga mihimo og operasyon.

Dunay mga pangalan nga gibutyag ang mayor base sa text message nga iyang nadawat. Una niini mitanyag si Osmeña og P100 mil nga ganti alang sa makaila sa mga armadong lalaki diha sa video.

Ang kadagkuan sa kapolisan dinhi sa dakbayan wala direktang moangkon nga mga polis ang nakita sa video.

Si Col. Royina Garma, hepe sa Cebu City Police Office, mitanyag pa og P200 mil nga premyo ni bisan kinsa nga moadto sa iyang buhatan ug moluwat og affidavit kinsay tinubdan sa video.

Ang hepe sa Talamban Police Station mihimakak nga iyang mga sakop ang anaa sa video ug daw sa nanghagit pa nga sila ikiha sa mga argabyado.

Dili malalis nga dunay nahitabo nga pagpangabuso ug pagpangawat. Ang pangutana kinsa ang mga responsable? Tinuod ba nga sila sakop sa kapolisan?

Wala ni magkinahanglan og “rocket science” aron matubag ang maong pangutana.

Ang buhaton ra gyud sa kadagkuan sa kapolisan mao ang pagpatawag sa hepe sa Talamban ug pangutan-on iya bang mga sakop ang naa sa video.

Wala na kinahanglana nga motanyag si Garma og P200 mil. Isip kumander sa kapolisan duna siya kopya sa tanang pre-operation ug post operation reports sa iyang mga sakop.

Didto iyang makit-an tinuod ba nga mga sakop to sa Talamban Police Station ang nangulata sa ilang dinakpan.

Suporta ko sa gihingusgang kampanya sa kapolisan batok sa illegal nga drugas.

Apan di sab makiangayon nga gamiton ning rason sa kapolisan nga moabuso labi pa gyud sa pagpanulis sa ilang dinakpan.

Dili angayang duphan sa mga opisyal sa kapolisan ang abusado nilang mga sakop. Way luna sa serbisyo sa nasudnong kapolisan ang mga abusado ug tulisan.

Sa dili pa maguba sa hingpit ang imahen sa PNP angayang ipakita nilang Col. Garma ug ubang opisyales nga dili sila mga konsintidor.

Dili dautan sa kumander nga modupa sa iyang mga sakop, apan dunay limitasyon niini.

ABUSO
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with