Nakasabot ko nganong nangugat gyud si Konsehal Maryann Delos Santos ug mihimo’g privilege speech atol sa sesyon sa City Council kaniadtong Martes ug nisaway sa binuhatan sa kapolisan nga iyang gihulagway nga nanggukod sa mga politiko nga alyado ni Mayor Tomas Osmeña.
Si Delos Santos maoy kandidato pagkabise mayor ni Osmeña ug ang mga opisyal sa kabarangayan sa kabukiran nga gipanghasi sa armadong mga tawo, ilang kaalyado.
Wala gyuy mga opisyal sa bukid nga kaalyado sa Barug-PDP nga gihasi.
Mga tawo nga giingong armado ug nagsakay’g mga motorsiklo, nanglangkat sa mga campaign materials sa mga kandidato sa BOPK didto sa kabukiran.
Dunay mga polis nga sakop sa Cebu City Mobile Force nga gidestino sa bukid, apan wala gyud sila makaaksyon niini.
Wala usab masulbad sa mga polis kadtong pagpangrakrak og mga bala sa balay sa mga kapitan sa Barangay Sudlon 2 ug Sinsin, sa kabukiran sa siyudad.
Pero ang gihimong police checkpoint duol sa balay ni Delos Santos ug Mayor Osmeña nakapasamot sa kasuko sa konsehal.
Kontra man gud sila si PRO-7 director Debold Sinas ug Cebu City Police chief Royina Garma mao nga giapike siya sa iyang mga kontra.
Gihulagway sa uban nga peligro ang gihimo ni Delos Santos kay mibarug siya ug gisaway ang gihimo sa mga opisyal sa kapolisan.
Kuyaw gyud tuod. Mikomedya pa gani si Delos Santos nga basin ang iya nang panimalay maoy sunod nga rapidohon og mga bala.
* * *
Mosuporta ko sa baruganan sa usa ka maglilindog sa The Freeman, nga mitan-aw sa sitwasyon karon sa politika sa probinsiya sa Sugbo.
Angay gyud nga sila si Gobernador Junjun Davide ug Vice Governor Agnes Magpale maninguha pag-ayo nga makakuha sila og daghang botos sa mga dapit nga balwarte sa ilang mga kaatbang nga sila si Kongresista Gwen Garcia ug Daphne Salimbangon.
Hinuon, kay incumbent man sila si Davide ug Magpale, mahulagway nga may pagkainilog sila sa mga botante, apan dili sila angay’ng mokumpiyansa kay abtik nga mangampanya si Gwen.
Si Davide hinoon mora’g dili kaayo maproblema batok ni Salimbangon, nga nagsangka karon pagka bise gobernador.
Ang nakabentaha lang ni Magpale kay base sa survey mora’g apektado gyud si Gwen sa pagkakaplag nga sad-an siya sa pagpalit og P97 milyones nga yuta sa Tinaan, Naga nga ang dakong kabahin naa mahimutang sa dagat.
Husto ang tambag nga bisan og nindot ang resulta sa survey, apan angay nga dili mokumpiyansa si Magpale kon gusto man siya nga makalingkod sa labing taas nga katungdanan sa probinsya.
Sangka kini sa duha ka babaye, apan nakabentaha lang si Magpale kay wala man siya gihapak og kaso nga pagpangawkaw sukad-masukad.