Balik sa naandan?

Tapos sa Kwaresma nga ni-culminate sa Semana Santa ug sa Easter Sunday, unsa man, balik ta sa naandan? Di ba mahimo nga atong padayunon kun unsa man ang mga maayong kausaban nga atong nasinati ug naangkon sa miaging mga Mahal nga Adlaw?

Kinahanglan bang mobalik kita sa naandan? Ug unsa man tuod ang atong naandan? Of course, balik kita sa kasaba sa politika. Sa pagdinautay sa isig-usa nga mga kandidato. Alang nila kinahanglan dauton gayud ang ilang mga kaatbang.

Dili mahimo alang kanila nga mo-focus lamang sila sa ilang mga baruganan ug mga prinsipyo; sa ilang mga plano sa panggobiyerno; sa ilang katakus pag-alagad sa lungsod;  ug sa ilang pagka-matinud-anon.

Unya, ang lungsod nay mohukom kon motuo ba sila sa inyong mga gipamulong, ug dili pinasikad giunsa ninyo pagdaot ang inyong mga kaatbang.

Gawas sa kasaba sa politika, unsa may lain natong naandan nga kinahanglan atong balikan?  Atong balikan ang atong pagkasaputon? Ang atong pagka-corrupt?  Ang atong pagka-drug addict?   Ang atong pagluib sa asawa o bana? Ang atong pagkapalahubog? Ang atong paglikay pagbayad sa hustong  buhis? Ang atong smuggling activities? Sa riding-in-tandem crimes?

Of course, daghan kitag mga maayong hiyas. Ato kining padayunon. Hinaut nga ang mga Mahal nga Adlaw nakahimo’g dakung impact sa atong kinabuhi nga makaingon kita sa atong kaugalingon nga at last, change has come.

* * *

Atong namatikdan nga lately, medyo nausab  ang tuno o baruganan sa atong nasud bahin sa isyu sa West Philippine Sea, nga si Patricia Lourdes Viray, sa Philippine Star nangutana: “ What triggered Duterte’s change in tune on West Philippine Sea?”

Matud niya, ang Duterte administration kuno “has recently been uttering stronger statements.”

Usa sa maong mga pamahayag mao ang pag-awhag sa Beijing “to stay away from Pag-asa Island. Ang maong pamahayag, matud pa, dili warning kundili usa lamang ka hinigalaay nga tambag.

Ang Palasyo namahayag nga kadtong arbitral ruling sa Hague bahin sa South China Sea, wala gayud ma-shelved o literally, wala isulod sa hunos atong nasud sukwahi sa gituhoan  ug giangkon sa uban.

So, sa pangutana ni Viray unsay naka-trigger pag-usab sa tuno sa administrasyon bahin sa isyo sa West Philippine Sea, nagpabilin kining pangutana.

Huwat ta sa dugang development.

* * *

Bida sad ning mga Tagalog uy! Niinsister man sila nga ang ilang “Ang Pasko ay Sumapit,” usa ka orihinal nga alawiton sa Pasko. Unsaon pagka-orihinal nga klaro man kaayo nga kinopya gikan sa kang Noy Inting  Rubi  nga “Kasadya ning Taknaa?”

Alang kanatong mga Sugbuanon, ang Tagalog version translation lamang gikan sa atong kaugalingon nga “Kasadya,” bisan tuod ang mga lyrics dili tukma nga pagka-translate. Apan, ang tuno dili nila maangkon nga ilaha. Sa gisuwat ni Karla Rule sa The Freeman, si Noy Inting natawo niadtong Enero 1903, ug nagpanuigon siya’g 30 iyang gi-compose ang “Kasadya.”

Wala kita masayud kun kanus-a kini nakopya sa mga Tagalog, kinsa niangkon nga sila ang orihinal ning maong composition.  Alang kanatong mga Sugbuanon, ang “Kasadya” giawit sa atong katigulangan sukad pa sa mga tuig 1930s. Ug hangtud karon, ang “Kasadya” atong giisip nga Christmas Anthem kanatong mga Bisaya.

Usa man diay, kitay nangopya sa ilang “Ang Pasko ay Sumapit?”