Kini ang bunga sa sakripisyo ug kakugi sa usa ka tawo kinsa naghago gyud aron mahatagan ug katumanan ang gitinguha nga damgo sa iyang kinabuhi sama sa 23 anyos nga Barangay Tanod sa barangay Kalubihan ning dakbayan sa Sugbo nga si Janryl Judilla Tan.
Mitapos siya sa kursong Bachelor of Science in Civil Engineering sa University of Cebu nga usa ka Cum Laude bisan pa man sa kalisdanan ug mga hagit sa iyang kinabuhi nga nahiaguman sukad pa sa iyang pagkabata.
Baranggay tanod siya kinsa na-assign panahon sa kagabhion ug ini’g ka buntag full time student.
Dili sayon ang iyang giagian tungod kay kun kwentahon 24 oras nga aktibo ang iyang lawas.
Sulod sa lima ka tuig ingon niini ang iyang kahimtang apan wala niya igsapayan basta makab-ot lang ang iyang gitinguha nga kalamposan, ug wala siya mapakyas tungod kay dili lang ang pagtapos sa iyang kurso kondili duna pa gyuy bonus nga mao ang iyang pasidungog nga naangkon isip cum laude.
Dili sulagma ang honor nga nadawat ni Janryl tungod kay utokan na gyud kining daan sukad sa iyang pre-school, elementary ug high school consistent valedictorian siya.
Produkto si Janryl sa usa ka broken family kansang inahan atoa sa Mindanao ug ang iyang amahan ania sa Sugbo.
Sa iyang pagkabata nagtubo siya sa iyang inahan hangtod nakatapos sa high school.
Inay ma-discourage siya, mas nagpursige si Janryl nga makatapos sa pagtoon maong mianhi sa Sugbo sa pamasin nga makapadayon sa kolehiyo.
Nahatagan ug kahigayonan nga nakasulod pagka barangay tanod sa Kalubihan nga maoy nakatabang sa pagkab-ot sa iyang damgo.
Tungod kay walay kaugalingong pinuy-anan, sa barangay hall si Janryl nagpuyo sa pagtugot ug suporta usab sa mga opisyal sa barangay.
Bugtong gisaligan ni Janryl sa iyang pagtoon ang iyang allowance isip scholar ug ang honorarium isip barangay tanod.
Ang kakugi ug determinasyon ni Janryl Tan usa ka sumbanan ilabi na sa mga batan-on nga dili babag ang kalisod basta maningkamot lang aron mahatagan kini og katumanan.
Focus lang gyud kuno ang gikinahanglan aron dili mahisalaag sa bisan unsa nga tentasyon ilabi na karon nga daghan na kaayong diversion sa attention sa mga batan-on nga mosimang na hinoon ug dili na makapadayon sa ilang gitinguha nga kalamposan.
Mas tam-is tagamtamon ang kalamposan kun nag agi kini sa kalisdanan!