Kadudahan gyud bitaw nga pamolitika ra kining gihimo ni Mayor Luigi Quisumbing nga pagpasirado niya sa duha ka hotel nga gitukod sa yuta nga gipaabangan sa siyudad ngadto sa Katumanan Hardware ug gipatukoran og hotel sa iyang affiliate company nga mao ang CENORE.
Nakapaminaw ko sa editoryal sa DYLA kagahapon, ug nakahunahuna ko sa pagtuki niining maong isyu. Ang 1.4 ka ektaryang yuta diha sa North Reclamation Area sa Mandaue, gipaabangan sa Mandaue kaniadtong 2007 ug ang City Council mitugot ni kanhi mayor Jonas Cortes sa pagpirmahay og kasabotan. Ang luna gigamit sa Katumanan Hardware nga ilang bodega.
Pagka 2012, nagmugna og masterplan ang Mandaue nga ang mga balay patigayon diha sa Mantawi International Drive, mahimo nga entertainment ug commercial hub sa siyudad, mao nga napugos ang mga kompaniya diha nga motuman sa masterplan, ug ang Katumanan Hardware, nakigsosyo sa CENORE aron motukod kini og hotel.
Matud ni Atty. Jamaal James Calipayan, ang abogado ni Cortes, nga ang pagsulod og kontrata sa Katumanan Hardware ngadto sa CENORE, maisip ra gyud nga legal, gawas pa, giuyonan na usab ni sa City Council.
Ang kampo ni Quisumbing nagduda nga nakakuwarta si Cortes og P25 milyones niining transaksyon sa Katumanan Hardware ug sa CENORE. Dinhing bahina nga mora’g dili na usab katuohan. Nakadungog hinoon ko nga ang mga tag-iya niining maong dagkong negosyo, dili mga supporter ni Luigi.
Ang akong gikuyawan nga basin moabot ang higayon nga unayon paggukod ni Mayor Luigi ang Norkis Company kay ang iya ra ba’ng apohan, gidungog nga tua misuporta ni Cortes.
Kadaghanan ra ba sa mga kawani niining maong mga kompaniya nga gipangsirad-an ni Luigi, taga Mandaue City ug nakasabot na kamo sa akong gustong ipasabot.
* * *
Nisugod na ko pagtambong og pulongpulong sa mga kandidato, ug diay nindot nga balita alang kang Konsehal Mary Ann delos Santos.
Naandan na gyud nako nga maminaw sa mga baruganan sa katawhan nga manambong ug naminaw sa diskurso sa mga kandidato.
Bisan diha sa mga barangay sa south district nga balwarte ni kanhi mayor Mike Rama, sama pananglit sa Barangay Tisa niadtong miaging gabii, daghan ang nakadayeg ni Mary Ann kay wala gyud kuno mosulti og pagpangdaot sa iyang kaatbang.
Mokunpirmar gyud hinoon ko niana nga lunlon projects ug mga maayong plano ra gyud, maoy ibatbat ni Mary Ann sa iyang mga diskurso.
Dihang bahina nga nakadayeg ko kay dili siya sama sa ubang mga kandidato nga mora’g mga iro nga nagsige’g paghot.
Ang mga botante maniid gyud sa batasan sa ilang mga kandidato nga botohan sa umaabot nga eleksiyon.