Gitubag ni Presidente Rodrigo Roa Duterte ang pangutana sa katawhan kun iisa ba niini ang kamot ni kanhi Mayor Mike Rama isip kandidato sa iyang partido sa pagkabise mayor sa dakbayan sa Sugbo.
Kaniadtong adlaw nga Domingo sa gipahigayon nga politikanhong rally sa PDP Laban nga partido dungan nga giisa ni Presidente Duterte ang kamot ni Bise Mayor Edgardo Labella nga kandidato sa pagkamayor ug kanhi mayor Mike Rama sa pagka bise mayor sa dakbayan sa Sugbo.
Tungod niini daw sama sa gibayaw sa kalangitan ug miabot sa dunggan ang ngisi ni Mike Rama gumikan sa dako niyang kalipay.
Para sa kanhi mayor nalimpyo ang iyang pangalan human giisa sa Presidente ang iyang kamot isip kandidato sa iyang partido.
Si Mike Rama gihinganlan ni Presidente Duterte nga tigpanalipod sa mga tigpayuhotan og ginadili nga drugas.
Apan ang tigpamaba sa Presidente nga si Atty. Salvador Panelo mihulagway sa pag-isa sa kamot ni Mike sa Presidente nga usa lamang ka kortisiya.
Sabton na lang nato si Panelo sa iyang pamahayag tungod kay sayod kita nga tua kini siya makapusta sa kampo ni Mayor Tomas Osmeña.
Gani kini si Panelo mao man ang taytayan ni Mayor Tomas Osmeña sa Malakanyang.
Ang pagtuo ni Panelo dili katuohan tungod kay nasayod na kita sa kinaiya sa Presidente.
Ang Presidente prangka. Kun wala pay plano ang Presidente nga iyang iisa ang kamot ni Mike iya na unta nga gimandoan ang taga PDP Laban sa pagpapahawa ni Mike o ba kaha sa dili pagpasulod niini sa Plaza Independencia diin gipahigayon ang rally.
Gibadlong na pod unta sa mga opisyal sa PDP Laban ang tigpaila sa kalihokan sa dili paghisgot sa pangalan ni Mike Rama.
Apan sa kadaghan nga higayon nga gi-mention ang pangalan ni Mike sa tigpa-ila walay mibuyag kaniya.
Ginaingon nga action speaks louder than words ug mao kini ang gipakita sa Presidente ngadto kang Mike Rama. Dako gayod ang rason nga magmaya ug maglipay si Mike.