EDITORYAL - Anti-drug awareness curriculum

Samtang bata pa ug linghod pa ang hunahuna, maayong tudloan na ang mga bata bahin sa makadaot nga epekto sa ilegal nga drugas.

Usa kini sa mga pamaaging nahunahunaan sa gobiyerno ilabi na sa Department of Health.

Dunay mga babag kaniadto kay nabalakang basin suwayan hinuon sa mga bata ang maong bisyo.

Apan tungod tingali sa kadako na karon sa problema sa drug addiction sa nasud, daw nakamata ang mga opisyales sa nasud.

Gikan sa Kindergarten hangtud sa Grade 12, tudloan ang mga bata nga malikay sa maong bisyo.

Ang plano sa DOH nga iapil na gyud sa main curriculum ang anti-drug education subjects.

Mas maayo gani nga iapil sa maong Preventive Drug Education program ang educational tours diin ipakita ngadto sa tinun-an kun unsay sitwasyon sa sulod sa mga prisohan dinhi sa nasud.

Aron mas masilsil sa mga hunahuna sa kabataan ang mensahe sa maong programa kinahanglang andaman kini sa DOH, DepEd ug uban pang hingtungdang ahensya og maayong mga aktibidades nga magana sa interes sa mga bata. Dili lang pulos basahon o salida.

Maayong iapil ang libreng educational tours ngadto sa mga prisohan, drug rehabilitation centers ug mga mental hospitals aron makita gyud o sa tinun-an kun unsay sitwasyon sa sulod sa maong mga pasilidad nga dad-an niadtong mga nalambigit sa ilegal nga drugas.

Aning paagiha mas mamahimong aware ang kabataan sa kung unsa ilang padulngan kun mosuway sila aning ilegal nga drugas busa sigurdo gyud silang magmatngon ug dili nila buhaton.

Kun kaniadto palang sa dihang unang namugna ang Republic Act 6425 o ang Dangerous Drugs Act of 1972 giseryuso ang kampanya ug giapil pagtudlo sa mga kabataan ang kabahin sa makadaot nga epekto sa ilegal nga drugas diha sa mga tunghaan wala na tingali kini amendahi nga karon nahimo ng Republic Act 9165.

Show comments