Inahang way tahod sa simbahan

Enero 13, Domingo, unang adlaw human matapos ang Pasko 2018, wala pay alas 4:00 sa hapon, napuno na sa mga sakyanan ang parking ground sa Guadalupe Parish Church nga gitagana lang unta para sa mga nanimbahay nga nanagdalag pribadong behikulo.

Suwerte ang usa ka tigsilbe sa misa nga may bakanteng parking space nga nahabilin, diin didto niya ipahimutang iyang SUV. Apan nahasol siya samtang nagtan-aw sa mga batang  nagdulag badminton.

Goma man tuod ang ulo-ulo sa birdie (badminton ball) nga mohanoy paglupad sa itaas ug may kabug-at inig kahulog sa ubos, pero ang solidong plastik nga gitaptan sa mga balhibo mahimong makamugnag garas sa mga inampingang behikulo nga gipangga sa tag-iya.

Pun-an pa sa mga gahing racket nga iwarawara ug ipuspos. Pastila’g masipyat, lumping man gyong sakyanan, ba!

Gikonsiderar sa kaparian ang maong lugar nga usa ka holy ground sanglit kabahin man kini sa kinatibuk-ang property nga gipanag-iya sa simbahan. Gidili dinhi ang pagduladula ilabi na panahon sa misa.

Apan dihang gibadlong ang mga bata sa tigsilbe sa misa, kinsa nahingawa basig makasala sila sa mga sakyanan, o sila maligsan ba hinuon, kalit lang mialma kadtong babaye (tingale, inahan nila):

Layo ra na sila, Sir! Dili gyod na maigo imong sakyanan. Ikaw ra gyoy nag-ingon ana. Tigsibe man unta ka sa simbahan. Nagtuo ka, ikaw ray naay awto. Duna pod mi amo, uy!”

Sa panuni sa iyang sinultian, klaro kaayo nga walay tahod sa simbahan ang maong ginang. Hibalo man diay siya, nga ang mibadlong sa iyang mga bata, taga simbahan, mirespeto ug naminaw unta siya. Iya unta silang gipahunong sa pagdula agig tuman sa unsay gidili. Apan giaway man hinuon niya ang tarong, uy, aron labanan ang nagpabadlong?

Wala na motubay ang tigsilbe sa simbahan sa kaaristokrata sa babaye.

Nakasabot na siya nganong bisan unsao’g pahinumdom sa kaparian ang mga parokyano nga gidili ang paglabay og sagbot sa Guadalupe Parish grounds, nanimaho gihapong angso ang paril nga naglibot sa simbahan, diin sa ubos nagpasad nagkadaiyang panit sa karmelitos ug basiyong plastic.

Kay imbes agakon sa ginikanan ang mga anak ngadto sa kahayag, gipasubay hinuon nila sa dalan paingon sa kangitngit.