Murag wala pa gihapon milurang ang kapaspas ug ang nagpungasi nga suntok sa atong pambatong kampiyon sa boksing nga si Manny Pacquiao ibabaw sa ring bisan pa man sa iyang pangidaron nga 40 anyos.
Sa atong nakita sa iyang ulahing away didto sa Las Vegas, Nevada kaniadtong Domingo, dominante si Pacquiao sa iyang pagpakigharong kang Adrian Broner, kinsa nangangkon nga iyang pakatulgon ang Pilipinong idolo sa boksing.
Dunay mga higayon nga mobarag ang hambogirong Amerikanong challenger, hapit matumba sa mga sunod-sunod nga mga kumbinasyon ni Pacquiao.
Swerte siya nga miabot pa og 12 ka hugna nga wala mahagba. Ang gipakita ni Pacquiao kaniadtong Domingo mao ang Pacquiao sa kanhi nga panahon, sa nag-edad pa og 20 anyos.
Wala nagpakita og kaluya ang Pilipinhong kampiyon, paspas molihok ug maayo usab og footwork.
Sa iyang kadaugan batok kang Broner, target karon ni Pacquiao ang Amerikanong wala pay pildi nga si Floyd Mayweather.
Apan ang dakong pangutana mao nga mokubit ba kaha si Mayweather sa hagit ni Pacquiao.
Kini tungod kay sa dihang gipangutana si Mayweather kabahin sa hagit ni Pacquiao, wala man kini mokihol.
Siguro kamulo pa nga nag-analisar ang Amerikano kun makigharong ba siya ni Pacquiao sa ikaduhang higayon.
Sa ilang unang sangka, nga maoy labing dako ug miguba sa mga rekord sa kasaysayan sa boksing, midaug si Mayweather. Apan palpak ang maong away gumikan kay wala kini mipakita sa gipaabot sa katawhan.
Daghang rason ngano nga daghang nagyam-id sa maong away kaniadtong 2015. Sa atong nakita, tusik dagan ang taktika ni Mayweather sama sa iyang naandang estilo.
Miangkon usab si Pacquiao nga wala kaayo siya makaarangkada gumikan sa injury sa iyang bukton. Kini ang hinungdan nga wala gyuy lami kadto nga kumbati sa ring.
Karon, ambot kun mokubit ba sa katapusan si Mayweather sa hagit ni Pacquiao.
Nagpanagana ba kini tungod sa maayong performance ni Pacquiao sa ulahi niyang duha ka sangka?
Hinuon, ingon ang kampo ni Mayweather nga wala kini planong mogawas sa iyang pagretiro ug mosangka pag-usab.
Komportable na kuno sa iyang kinabuhi, kinsa daghan kuno nga giasikasong negosyo.
Hinuon, adunay daghan sa iyang division nga mga batan-on kinsa gustong makigharong ug mosukod kon asa kutob ang hangin sa nagkatigulang nang si Pacquiao.