Paglawog sa mga bata
Ambot nahibawo ba ang mga kongresista nga nibotar sa pagpaubos sa edad sa criminal liability gikan sa 15 ngadto sa 9 nga ang karaang balaod nga ilang giaprubahan unom ka tuig ang nilabay (Republic Act No. 10630) wa pa hingpit nga mapatuman hangtod karon.
Ambot nahibawo ba sila nga ang ilang pangu, si House Speaker ug kanhi Presidente Gloria Macapagal-Arroyo, maoy nagpirma sa orihinal nga Juvenile Justice and Welfare Act (R.A. 9344) niadtong 2006.
Ang 13 anyos nga balaod igo lang gipalig-on niadtong 2013 aron mas kapanalipdan ang katungod sa kabataan.
* * *
Di hinuon kahibudngan ang salawayon nga gihimo sa mga kongresista.
Kay wa man sila nabantog sa kamatinud-anon sa pagtuon sa mga balaudnon nga ilang gipasar.
Mas sayon alang nila ang pagpili-pili og mas ubos nga edad kay sa pagtugkad sa gamot nga mga hinungdan sa kapakyas sa pagtul-id sa mga bata nga nisukwahi sa balaod.
Apan kun nakahigayon pa lang unta pagsusi, ila untang mahibaw-an nga ang kapakyas sa local government units (LGUs) sa pagtukod sa mga Balay Paglaom (Bahay Pag-asa) maoy nakapa-inutil sa mga paningkamot paghatag sa madakpan nga mga bata og bag-ong sinugdanan.
* * *
Tungod sa pangangkon ni Arroyo nga gidasonan rang awhag ni Presidente Rodrigo Duterte, si Senate President Tito Sotto niuyon dayon.
Apan inay dasonan ang giaprobahan sa mga kongresista nga 9 anyos, niduso si Sotto og iyang kaugalingong numero nga 11, sa way pagtino may pagtuon bang gipasikaran.
Gitataw hinuon ni Presidential Spokesperson Salvador Panelo nga ang presidente wa pa makatino unsay tukma nga mas ubos nga edad.
Gani, sa iyang mga diskurso, klarong wa pa kahibawo ang presidente nga nausab nang RA 9344 sa RA 10630.
* * *
Labihan kasalawayon sa gihimo sa mga kongresista nga bisan ang sinaligan sa presidente nga si Foreign Affairs Secretary Teddy Boy Locsin nabalaka nga tungluhon ang Pilipinas sa ubang kanasuran. Ambot may nakahunghong bang Locsin nga hagbay ra kay nilayas si Presidente Duterte sa International Criminal Court (ICC).
Ambot makadulot ba sa nagpabaga nga mga kongresista ang kahait sa dila ni Locsin kinsa nipasidaan nga mag-piyesta ang pedophiles kay manuburno na lang og jail guards aron lawgan og 9 -anyos nga mga piniriso.
* * *
- Latest
