Kuyakoy

Hayan matangtang sa serbisyo ang duha ka mga bag-ong polis tungod sa mga kasong administratiba nga ilang giatubang human sa lapad nga operasyon batok sa mga gidudahang rebelde didto sa Negros Oriental niadtong miaging buwan.

Gimando ni Chief Supt. Debold Sinas, hepe sa kapolisan dinhi sa Central Visayas, nga pasakaan og kasong dishonesty ug cowardice ang manag-agaw nga sila si PO1s Thomas Cañete ug Melvin Cañete.

Ang duha ka sakop sa Regional Public Safety Battalion kabahin sa usa sa mga teams nga mihimo og pagpangronda didto sa Guihulngan sa Negros Oriental niadtong Disyembre 28.

Nagtuo si Sinas og napatay sa mga rebelde ang duha tungod kay kalit ning nahanaw. Tungod sa ilang pagkahanaw nalangan ang operasyon didto sa Negros tungod kay kinahanglan silang pangitaon.

Ang usa ka opisyal sa polis nga uban sa operasyon mitug-an nga  lakip si Sinas misaka sa bukid aron motabang sa pagpangita.

Milanat og kapin sa duha ka oras ang pagpangita sa duha hangtud nga natultulan pinaagi sa ilang mga cellphone.

Didto na makit-i ang duha sulod sa usa ka restaurant sa silingan nga lungsod sa dakbayan sa Guihulngan.

Matud ni Sinas nga “nagkuyakoy” ang duha ka polis. Buot  ipasabot nga nagpahayahay sa ilang baga ang mga karaho samtang nalisang ang ilang mga kauban ug mga opisyal sa pagtuo nga dunay dautang nahitabo nila.

Nasuta nga mikaratil og dagan ang duha dihang nakadungog og mga buto sa armas.  Dihang gisukitsukit sa ilang mga opisyal ang duha nangangkon nga nahagbong sila sa sapa ug natanggong.

Di gyud tinuod angayang mahimong pulis ang duha. Kun tinuod nga nangalisang sila dihang nakadungog og buto way rason aron sila magpabilin sa serbisyo.

Mas bagay tingali nila ang gunting ug sudlay didto sa parlor. Gawas sa duha ka batan-ong pulis. Duna pay laing tulo ka mga opisyal ang ipaubos sa  imbestigasyon tungod kay nag-una og pamauli.

Samtang ang ilang mga kauban nahabilin pa sa Negros ug nagpaabot nga mahuman ang operasyon, ang tulo nga nagranggo og chief inspector ug duha ka inspector nisibat.

Ambot tungod ba sab kaha sa katalawan o buot lang makig-uban sa ilang pamilya panahon sa holidays.