EDITORYAL - Gihalangan sa survey

Mikisi-kisi ang Malacañang sa resulta sa SWS survey nga nagpakitang mayoriya sa mga Filipino ang wala makauyon sa aksyon sa gobiyerno kabahin sa isyu sa West Philippine Sea. Natural gyud nga murag gisilihan ang Palasyo tungod kay gipagawas kini atol sa state visit ni Chinese President Xi Jinping sa Pilipinas kagahapon.

Gipakita sa Social Weather Stations survey nga  gihimo niadto pang Septiyembre 15 hangtud 23 sa 1,500 ka mga hamtong nga gipanguta, 84 porsiyento niini ang nagprotesta gyud sa kawalay gihimo sa gobiyerno aron panalipdan ang soberiniya sa nasud diha sa giilogang teritoryo.

Sumala pa sa maong survey ang pagsalig sa mga Pilipino sa China nisaka og dyutay nga karon nahimo nang “poor” -16 niadtong Septiyembre gikan sa “bad” -35 kaniadto.

Ang International Arbitration nipagawas na og resolusyon nga nag-ingong ang maong mga teritoryo naa sa sulod sa exclusive economic zone (EEZ) sa Pilipinas ug tanang resources niini alang lamang sa mga Pilipino.

Apan wala ilha sa China ang maong ruling ug mipadayon sa pagpangilog sa mga teritoryo nga giangkon sa Pilipinas pinaagi sa pagtukod og mga artipisyal nga mga isla nga gihimo nila karong mga base sa militar.

Gisaway og maayo si Presidente Duterte tungod sa bugnaw niyang pagtagad bisan og nag-deploy na ang China og mga nuclear capable bombers sa usa sa mga artipisyal nga isla.

Ang presensya sa maong mga abyon direktang hulga sa seguridad sa tibuok Pilipinas.

Apan tigpamaba sa Malacañang nga si Salvador Panelo mikwestyon sa tayming sa pagpagawas sa maong survey. Namasangil siya nga kini gituyo aron i-mislead ang publiko aron motuo nga wala gyuy gibuhat ang  gobiyerno bahin sa WPS.

Ang Department of Foreign Affairs mipagawas og pamahayag kaniadto nga dili tanang gipangbuhat sa gobiyerno bahin sa WPS kinahanglang ipublikar.

Kun tinuod ni, ang DFA maoy angay basulon tungod kay katungod sa tanang mga Pilipino mahibaw-an ang tanang gibuhat sa gobiyerno sa WPS.