Di makapabarato ang pagarpar
Ug natinuod ang atong gikahadlokan. Pagarpar ra gyud diay nag-ayo ining Agriculture Secretary Manny Piñol. Patuga-tuga siya og pahamtang og suggested retail price (SRP) sa bugas humay, uban ang abunda nga pasalig nga motibugsok na ang presyo sa commercial rice, apan di diay gihapon mapatuman.
Gisuspenso sa National Food Authority (NFA) ang pagpatuman sa SRP sa bugas humay sa Sugbo human napamatud-an sa mga sakop sa Grains Retailers Confederation (GRECON) nga mas taas ang ilang palit gikan sa suppliers ug busa di lang nga way ganansiya maalkanse pa gyud sila.
* * *
Nakumbinser si Regional Director Fernando Nunez sa NFA Central Visayas sa kwentada ni Consolacion Mayor Nene Alegado, ang kanhi nasudnong presidente sa GRECON, nga nagsalig ang mga Sugbuanon sa bugas gikan sa kasilinganang mga isla busa kinahanglan pang mogasto ang mga negosyante sa dagkung plitehan sa mga barko.
Maong niuyon siya nga samtang giandam pa sa GRECON ang ilang position paper nga pormal nga moawhag ni Piñol sa pagtakda og mas taas nga presyo sa bugas humay alang sa Sugbo ug Central Visayas di lang una nila ipatuman ang SRP.
* * *
Niinsister si Piñol nga ang SRP gipasikad sa iyang pakigsulti sa dagkung mga negosyante sa bugas humay sa nasud. Sa pikas nga bahin, pipila ka opisyal sa GRECON niingon nga gikwestiyon nila ang kamakiangayon sa SRP apan wa sila paminawa ni Piñol.
Kadudahan ang kamatinud-anon ni Piñol: Iyang gipahibawo niadtong Oktubre 18 nga itakda sa SRP nga P44 lang matag kilo ang labing mahalon nga commercial rice; apan dihang napagawas na ang SRP, P47 na ang kinatas-ang presyo.
* * *
Nasobrahang mga pagarpar ni Piñol ang tinubdan sa kalibog nga nihakop karon sa industriya sa bugas humay:
• Una niyang gipasidaan niadtong Oktubre 18 nga ipahamtang na ang SRP sa bugas humay sa Oktubre 23;
• Way SRP nga napatuman pagka Oktubre 23, nipirma hinuon si Piñol og memorandum circular isip tsirman sa NFA Council sa pagtakda og bag-ong SRP pagka Oktubre 24 (mahimong natambagan sa mga abogado nga ang SRP kinahanglang isuwat di isulti lang);
• Epektibo na untang SRP niadtong Nobiyembre 10, human napublikar sa nasudnong pamantalaan niadtong Oktubre 26, apan karon pa nahibaw-an nga kadudahan diay ang sukaranan.
* * *
- Latest
