Gumikan sa teknolohiya nga ‘Quantum’, ang eroplano kaniadto morampa paglayo, karon sama sa chopper moulpot sa lang sa itaas makalupad na. Mga sakyanan karon mahimo na padaganon ug paluparon nga wala nay driver o piloto. Ug daghan pa nga kaugmaran nga sa salida sa sine o sa video na lang nato makita.
Apan ang labing mapuslanon nga kagamitan sa ‘Quantum technology’, mao ang ekipo o kahimanang pangmedikal (medical equipments) ug mga produkto niini nga nadebelop alang sa pag-alibyo sa mga problema sa panglawas.
Ang pipila niini anaa na sa atong palibot, busa magka-interes kita sa pagpaniid aron makapahimulos kita sa kaayohan ning maong produkto sa ‘Quantum technology’.
Kon kaniadto magpa checkup kita sa klinika sa doctor, hasol nga sukitsukiton ang pasyente, aron pagtumbok sa nahimong problema. Unya iduso kita sa ‘diagnostic centers’ aron ipabasa sa doctor ang resulta (findings). Ug unya kon magkalisud, aron maklaro makuyawan ta nga isulod ang tibuok lawas nga iplastar sa morag morgue nga dagkong ekipo sa MRI, nga komon kini sa ospital.
Karon sa kahimanang ‘Quantum computer’ o magnetic analyzer, wala nay sukitsukit kay ang motubag sa mga detalye sa imong kahimtang mao ang analyzer, diin makita ang gipamating sakit ug makita sab ang padung pa sa pagkasakit.
Unya sa pag-analisar, ang MRA (magnetic resonance analyzer) maoy say mohatag og unsay angay nga buhaton. Unya pinaagi sa MRA, nga mabitbit lang bisag asa, mamonitor nimo ang imong kondisyon kon naarang-arang na ba.
Gawas sa mga ekipo nga ‘Quantum’, naa say pipila nga mga produkto niini, alang sa pagpaalibyo sa mga isyu sa panglawas. Sama pananglitan, mga magnetic plaster o holograms, quantum pendants, quantum nano magnetic cards ug uban pa.