Nasuyop sa Angkas
ARANGKADA - Leo Lastimosa (Banat) - October 24, 2018 - 12:00am

Nitiyabaw ang pipila ka taxi drivers sa Sugbo: Human giaprubahan sa Land Transportation Franchising and Regulatory Board (LTFRB) ang dakong umento sa ilang plitehan, nitidlom pag-ayo ang gidaghanon sa ilang mga pasahero; mao nga daghan sa ilang kaubanan ang nibiya na lang sa pamasahero ug nangita og laing trabaho.

Matud nila ang labing klarong ebidensiya sa kamingaw sa ilang panginabuhi mao ang kadaghan sa taxi units nga wa nay gawas-gawas gikan sa garahe sa ilang operators.

Kay wa sab magdugay ang mga drayber nga ilang gipangdani pagpuli sa mga nibiya.

* * *

Sa sinugdanan nitumaw ang naandan nga pagduda sa taxi drivers ug operators nga gidagit sa Grab Car ang ilang mga pasahero.

Apan pipila sa ilang mga pasahero nisumbong nga susama ra o mas taas pa gani usahay ang plitehan sa Grab kay sa mga taxi.

Nakugang sab sila pagkadungog sa tiyabaw sa ilang kaila nga mga drayber sa Grab nga utro sab sila nga nagmingaw.

Labaw pang nabawo kay nagpaabot untang mag-piyesta sa mas daghang pasahero human nibiya ang Uber ug samtang wa pa maka-ugpo ang bag-o nilang mga karibal.

* * *

Diin man diay padung ang mga pasahero nga nalisang sa mas tag-as nga plitehan sa taxi ug Grab? Napugos ba pagsakay pagbalik sa public utility jeepneys (PUJs) bisan sa grabeng kahuot ug kalangay?

Apan gipahibawo sa napangutana nila nga PUJ drivers nga wa mosulbong ang gidaghanon sa ilang mga pasahero. Puno sila kon ting-klase ug sa una ug kataposang adlaw sa semana apan mingaw gihapon sa weekends ug holidays.

* * *

Karon lang bag-o nilang nailhan ang bag-ong nakapuhal sa ilang panginabuhi:

Ang nabanhaw diay nga operasyon sa Angkas, ang online nga mga habal-habal, ang nakasuyop sa kasagaran sa ilang mga pasahero.

Nipasangil sila nga nigara ang Angkas bisan wa pay pagtugot gikan sa LTFRB kay gipaluyohan sa inilang politiko sa Sugbo.

Mas daghang drayber ang nadani kay may gipang-apud-apod nga jackets, helmets ug motorsiklo nga gamay rang inadlaw nga data-data.

Ug kon tungod sa ilang kadaghan ma-ato pagkuha ang tanang ni-book online, mahimo ra nilang tilukon ang mga pasahero nga nag-atang sa mga eskina ug ang ilang mga suki sa call centers.

* * *

leo_lastimosa@abs-cbn.com

ANGKAS
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with