Too much love will kill you

Ambot, kon pila na kaha ka kinabuhi ang naghikog tungod sa sobrang paghigugma sanglit sagad, suklian lang og pagluib?

Pipila na kaha ka higayon nga mitibi ang dagat ubos sa Fernan Mactan-Mandaue Bridge dihang walay nahimo ang iyang mga balod nga gusto untang mosawo-sapnay sa samarang kasingkasing ni Inday, kinsa miambak human biyai sa bakakong hinigugma nga nagbilin og masakit buhing handomanan sa nailad niyang sabakan?

Akong kauban kanhi sa trabaho, usa ka buotang bana, gibudhian sa iyang asawa.

Gihatagan niya’g igong salapi nga para negosyo, gipalitan niya’g multicab para kargahan sa mga binulig saging nga ilang sugaton sa pier nga ibaligya ngadto sa ilang mga suki ug labaw sa tanan, nagkuha pa gyud og drayber aron dili kaayo mahago iyang misis.

Apan naunsa ba, nga gikan sa trabahoan, ini’g uli niya sa ila inig ka kaadlawon maabtan man niya nga pirmeng nagduladulag kalayo  iyang misis ug ang drayber sulod sa ilang lawak?

Giduol kong Ngards (di tinuod ngalan), uy! Ug mihangyo, nga mahimo bang  mokuyog siya sa amoa kay may isumbong nga dakong suliran sa iyang kinabuhi. Mao kadto, nga iya akong gitug-anan nga tungod sa kadako sa iyang gugma ngadto sa asawa, iya na lang kining gipasagdan nga  magsige’g dulog ug ang ilang drayber kay unsaon, dili man kuno niya mahatag ang kinatibuk-ang katagbaw niini sa panghilawas nga didto ra matilawi ni Durika (ngan gipugngan) sa batan-on nilang tsuper.

Pero, naghilak si Ngards nga mipahungaw sa nagpuot niyang gibati: “Mao nga nakahunahuna na lang ko, Boss Jav, sa paghikog!”

Haskang igkinga nako sa iyang gipamulong. Gipahinumdoman nako sa Two Greatest Commandments of God which are all about True Love.

Giestoryaha’g mga sambingay ug gipabati sa mga malumong pulong sa Diyos nga makaalim sa mga kasingkasing nagbangutan.

Ug salamat sa gahom sa Espiritu Santo kay Iya kong gisuplayan sa tukmang healing words of wisdom  nga naghatag og kahayag sa nablangkong hunahuna ni Ngards.

Napugngan ang paghunos sa kaugalingon niyang kinabuhi. Ug nakamatngon, nga dili maayo ang paghatag og naghinobrang gugma nga wala na sa lugar.  Tungod kay too much love will kill you. Bitaw, anything nga sobra, mausik ug maka-spoil lang!