Kinsa ang mabasol?

Unsa man gyud ang nakaingon sa pagdahili sa yuta didto sa bukid nga bahin sa Barangay Tinaan, Dakbayan sa Naga?

Kon imong tan-awon pag-ayo ang hulagway sa kabukiran sa Naga sa wala pa kini mag-landslide, makita nimo nga gipanitan na ang kinaibabwan tungod sa padayong pagpanguha og anapog.

Nahanaw na ang mga kahoy nga mao unta ang mopugong ug maghatag og kalig-on sa yuta.

Tungod sa pagsige og uwan sa milabay’ng semana, ang tubig direkta na nga mipaingon sa ilawom sa mga anapog.

Tungod sa daghan kaayong tubig nga mituhop sa kinahiladman sa bukid nga nahimo na nga bukid sa mga anapog, nahumok ang ilawom niini ug misugod na paglihok ang yuta.

Mao kini ang hinungdan nga nakabantay ang mga nagpuyo sa maong dapit nga nangliki ang bukid, ang gidak-on sa liki masulod gani ang tawo. Tungod sa paghumok na gyud sa anapog, wala na makaagwanta og nahugno gyud ang bukid.

Karon ang pangutana, kinsa man ang angay’ng manubag niini?

Una, ang kadagkoan sa kagamhanan dili gayud makalikay sa pagbasol kay isip mga opisyal, sila unta maoy angay’ng motan-aw ug mosabot kon ang quarry operation sa ibabaw sa bukid, dili ba makahatag makadaot.

Kon gigamit pa sa mga opisyal sa kagamhanan ang ilang maayong panghunahuna, mahunahuna gyud unta nila nga ang quarry operations sa ibabaw sa bukid makahatag og kakuyaw sa mga nagpuyo sa kilid ug ubos sa bukid.

* * *

Wala malilong kanato nga bisan dinhi sa kabukiran sa Dakbayan sa Sugbo adunay nagpadayon nga mga quarry operations nga walay permiso sa kagamhanan.

Pakyas ang atong mga opisyal sa dakbayan paghatag og pagtagad niini.

Nakadungog ko nga gimugna na pagbalik ang Mining and Regulatory Board sa dakbayan ug kini gipangulohan ni Konsehal Alvin Arcilla.

Apan mora’g wala may gihimo batok sa mga ilegal nga quarry operations ug tungod niini, nangaparot na ang daghang bukid diha sa Pulambato ug kanait nga mga barangay.

Kanus-a pa man kamo molihok, unya na ba kon ang nahitabo sa Naga, mahitabo usab dinhi sa ato? Unya, didto sa kabukiran sa Barangay Togonon, Dakbayan sa Danao, ang katawhan nga nagpuyo sa ubos sa bukid, nagsugod na sa pagkahadlok.

Dunay mining operations sa ibabaw nga nanguha og Phosphate mineral.

Nabalaka ang mga tawo nga tungod sa pagkaguba na sa bukid ibabaw sa ilang gipuy-an, tingali og moabot ang higayon nga malukapa na usab ang maong bukid.

Palihug, kamong mga hingtungdang opisyal, tagda ninyo kining maong mga isyu.