Ang konsabo

Nahibulong ko ngano nga dili parehas ang presyo sa tiket sa lotto sa mga ticketing outlet sa Philippine Charity Sweepstakes Office (PCSO) ilabi na sa mga outlet sa gitawag og Small Town Lottery diin makapalit ka og tiket sa swertres lotto.

Ako pod nga naobserbahan nga dako ang premyo sa tiket sa swertres lotto nga imong mapalit sa mga STL outlets kay sa mga outlets nga gipadagan mismo sa mga tawo nga accredited sa PCSO.

Sa mga STL pwede pod ka nga makapalit og tingi-tingi.

Sulod sa pila na ka buwan nga milabay ang tiket sa Swertres Lotto tag P12 na samtang ang Jackpot Lotto ticket tag P24 na.

Pero sa mga STL outlet tag P10 lang gihapon ang ilang swertres tiket.

Nganong ingon ani man? Nganong mitugot man ang PCSO nga kompetensiyahan sa mga nagpadagan og STL ang ilang Swertres Lotto?

Dako ang akong pagtoo nga nakigkonsabo sa sindikato sa gidili nga numbers game ang Philippine Charity Sweepstakes Office.

Tungod sa panagkomboya nakasulod ang gidili nga numbers game sa PCSO ug gihatagan nila kini og dagway sa pagka-lehitimo aron dili masakpan ang ilang kasabotan.

Klaro ug tataw kaayo sa atong mga mata ang pagtonto sa PCSO sa gobiyerno ug sa publiko tungod sa bantang nga pagpanurok sa daghang mga STL sa bisan asang dapit sa Dakbayan ug Lalawigan sa Sugbo nga ila lang gipasagdan bisan pa man wala silay accreditation sa PCSO.

Kun wala pa makigkonsabo ang PCSO sa sindikato sa gidili nga numbers game, layo ra ang usa ka oras nga ilang paaboton, hasmagan dayon nila ang mga STL outlet nga walay accreditation sa ilang buhatan ug pasirad-an, dayon taralon ang mga nagpadagan niini.

Pila kaha ang madawat nga porsyento sa taga PCSO sa matag numero nga mahalin sa mga ilegal nga Small Town Lottery outlet?

Nangutana lang.