Akong pagsabot sa amnesty

Ang gobiyerno sa Pilipinas adunay tulo ka gamhanang sanga: Ang legislative, judiciary ug executive. Ang legislative mao ang Kongreso ug Senado nga tigpanday og mga balaod. Ang judiciary mao ang Supreme Court nga gilangkoban sa Chief of Justice ug ubang mahistrado, kinsa maoy mopasabot sa balaod, mo-review sa mga kaso, diin nagbase kanunay sa patas nga paghukom sumala sa unsay nahisulat sa atong Philippine Constitution.  Samtang ang executive mao ang Presidente, Bise-Presidente ug ang mga cabinet members.

Ang presidente maoy modala sa renda sa nasod. Siya ang mopasunod ug mo-implementar sa balaod. May executive power siya nga mohimog Executive Order ug Presidential Decree nga sa iyang tan-aw makaayo sa dagan sa nasod.

Usab, may solo siyang gahom nga makahatag og ‘amnesty’ ngadto sa naprisong makasasala subay sa mga rekisitos nga gilangkob diha sa iyang pagproklamar.

Presidente lang ang makahatag og amnesty. Dili ang Kongreso, Senado o Korte Suprema. Busa, importante gayud nga ang Presidente maoy mopirma sa dokumento kinsang kriminala ang gihatagan niya’g kagawasan (amnesty). Kon walay ngalan ang listahan sa gitagaa’g amnesty, unya dili pa gyud ang presidente maoy mipirma, natural, nga dili gyud kini matawag nga balido.

Ug mao ni ang usa sa mga gibasehan ni Duterte nganong iyang girebokar ang amnestiya nga naangkon ni Senador Antonio Trillanes IV panahon sa administrayon ni PNoy.

Kay ang mipirma sa sertipiko sa amnesty ang kanhi mang Defense Secretary Voltaire Gazmin, kinsa matud pa,  gisugo ni PNoy.

Usa ka constitutional law professor miingon, nga wala kuno mahisulat sa Philippine Constitution nga ang kanhi Presidente PNoy mao gyuy mopirma tanang pirmahanan. Mao nga gi-delegate lang kini ni PNoy ngadtong  Gazmin. Busa, balido kuno gihapon.

Hey, Professor, are we watching same channel? Tinuoray bitaw nga wa mahisulat nga pirmahan sa presidente ang tanan. Pero nahisulat nga Presidente ray makahatag og amnesty.  Ang mga pulong sa nagsugo mawala.

Pero ang nasulat sa papel diin ang mipirma dili ang presidente makita, mahimong ebidensiya nga dili gyud mao ang gihimo nilang PNoy ug Gazmin.

Aw, paabot na lang ta kinsay modaog  sa  maong pagrebokar: Si Trillanes ba, o si Duterte? Basta mao nay pagsabot nako sa amnesty.