Gireklamo sa sobra tulo ka gatos ka mga nagpuyo sa Our Lady of Guadalupe Mountainview Subdivision sa Pagtambayayong, Kalunasan, Dakbayan sa Sugbo sa buhatan sa Ombudsman sila si Mayor Tomas Osmeña, Gobernador Hilario Davide III ug ang mga warden sa Cebu City Jail ug Cebu Provincial Detention and Rehabilitation Center nga sila si Renante Rubio ug Reynaldo Valmoria tungod sa halos dili na maagwanta nga ka baho sa ilang dapit mugna sa mihungaw nga septic tank sa duha ka prisohan.
Ang kabaho sa mihungaw nga septic tank sa duha ka mga prison facilities nakamugna og dako kaayo nga kahasol sa mga nagpuyo sa dapit. Usa sa mga dapit nga apektado kaayo sa ka baho mao ang simbahan diin ang pari nga magmisa apektado kaayo.
Ang mga nagpuyo sa dapit nangayo og tabang ni Atty. Eugene C. Orbita aron ilang mapaabot ang ilang yangungo ngadto sa hingtungdan nga ahensiya sa gobiyerno. Tungod niini, ang Cebu City Health Department mipadala og inspection team aron masuta ang reklamo.
Base sa resulta sa pagtan-aw sa duha ka prison facilities nasuta nga guba ang Sewerage Treatment Facility niini sulod sa dugay na nga panahon. Nasuta usab nga sa gawas nga bahin sa koral adunay PVC pipe nga may tulo ka pulgada ang gilapdon nga adunay nagdagan nga hugaw ug baho nga tubig nga direktang mipadulong sa abli nga kanal sa City Jail nga mikonektar usab sa kanal sa CPDRC.
Ang hugaw nga miagi sa nagdugtong nga duha ka kanal sa City Jail ug BBRC midagayday kini sa sapa paingon sa Langub Shrine nga maoy nakamugna og grabeng ka baho sa dapit nga makamugna og sakit.
Tungod niini, girekomendar sa Cebu City Health ngadto sa BJMP, DEPW ug Cebu Provincial Engineering Office ang paghimo dayon og dinaliang lakang sa gipaabot nga reklamo apan hangtod karon wala pa gihapoy gihimong lakang ang nahisgotang mga ahensiya nga gipangulohan sa gipangkiha.