EDITORYAL - Mga vendors patabangon

Ang pagpamaligya diha sa aseras, dili gyud unta angay tungod kay gihimo ang sidewalk aron kaagian sa mga tawo nga maglakaw. Tungod sa pagdagsang sa mga sidewalk vendors, ang ubang tawo adto na lang moagi sa karsada ug nakapahasol na usab sila sa mga motorista.

Sa sesyon sa Cebu City Council kaniadtong Martes sa hapon, midiskurso ang presidente sa kahugpongan sa mga sidewalk vendors sa dalan Colon ug mipadayag kini og kabalaka tungod sa gisugyot nga ordinansahon ni Konsehal Junjun Osmeña kay basin og mapalayas sila gikan sa ilang nahimutangan.

Nindot ang pasalig ni Konsehal Osmeña nga ang iyang ordinansa wala gitumong aron nga ang mga naninda sa aseras palayason gikan sa ilang gitindahan, apan gitumong kini niadtong mga magtukod og permanente nga estraktura diha sa aseras, ilabi na kon anaa na gyud sa karsada.

Husto ang lakang sa mga opisyal sa dakbayan nga kadtong mga pobre nga nanginabuhi intawon pinaagi sa pagpaninda diha sa aseras, dili lang kaayo pit-on kay ilegal man tinuod ang ilang gihimo, apan ila kining paagi sa pagpanginabuhi.

Ang usa lang hinoon sa kakuwangan sa mga lider sa lainlaing kahugpongan sa mga vendors kay wala sila makapatuman og estrikto nga mga lagda sa ilang mga sakop aron unta hapsay ug limpyo ang aseras bisan og anaa sila maninda.

Bisan ang kadagkoan sa Division for the Welfare of the Urban Poor (DWUP) dinhi sa Dakbayan sa Sugbo, pakyas usab sa pagsuperbisar pag-ayo sa mga vendors aron dili sila mahimong problema sa katilingban.

Gipasagdan na lang sa DWUP ang mga naninda sa aseras nga mag-atbang sa pagbutang og mga lamesa, o karomata nga gibutangan sa ilang baligya diha sa aseras, apan maayo kaayong moyawit sa pulong “one side vending.”

Nindot gyud unta nga bisan og adunay naninda sa aseras, apan usa lang ka bahin sa aseras ang pabutangan og mga stalls sa mga vendors. Makita karon nga kay nag-atbang man ang mga stalls, ang mga tawo nga maglakaw maoy nasakripisyo.