Polis namakak?

Gihimakak sa kadagkoan sa kapolisan sa rehiyon 7 ang pasangil nga polis na usab ang mibanhig patay sa lain nga sakop sa PDEA-7 nga si Von Rian Tecson. Ang maong polis giila nga si SPO1 Roderick Balili kinsa namatay pila ka adlaw sa pagpamanhig human makabawos kaniya ang iyang gibanhigan sa wala pa kini mamatay.

Apan dili si SPO1 Balili ang nagbanhig patay kang Tecson. Si Chief Superintendent Debold Sinas ang hepe sa kapolisan sa rehiyon 7 miingon nga naunay lang sa  iyang armas si Tecson samtang nagdagan ang sakyanan nga ilang gisakyan paingon sa bukiran nga bahin sa lungsod sa Pinamungajan sa Lalawigan sa Sugbo alang sa ilang pagpaniid sa kalihokan sa kanhi polis nga si  Basilio “Nilo” Quirante nga giingon nga nalambigit sa sugal, gidili nga drugas ug suspetsado sa pagpangrakrak kaniadtong Disyembre 4, 2015.

Si Sinas nagkanayon nga naunay si  Balili sa iyang 9mm nga armas dihang aksidente kini nga nakablitan sa ilang driver dihang nakatunob og hump ang ligid sa sakyanan nga ilang gisakyan atol sa pagtunol niini sa armas kang SPO1 Balili.

Tugotan ta nga tinuod ang gisulti ni Sinas, nganong miabot pa man og pila ka adlaw una pa sila mipagawas sa ilang sugilon sa hitabo.

Human sa hitabo gihinganlan na ni Mayor Tomas Osmeña si  Balili nga maoy nagbanhig ni Tecson apan nganong hilom man si Sinas.

Kon naunay lang sa iyang armas si Balili nganong gitagoan man siya sa iyang mga labaw ug wala ipakita sa publiko?

Nganong nahadlok man ang liderato sa kapolisan nga makita sa katawhan ang polis nga ilang giingon nga naunay lang sa iyang armas?

Ingon ani ba gyud ka protective si Chief Superintendent Debold Sinas sa iyang mga polis nga bisan maunay lang sa iyang armas iyang tagoan ug pabantayan og daghang polis?