Wala na ko masurprisa pa dihang gibutyag ni Mayor Tomas Osmeña nga nagduda siyang dunay mga grupo sa mga tawo nga gikan sa laing lugar, ug protektado sa kapolisan, aron mohimo og mga pagpamatay dinhi sa Sugbo.
Ang tinuod, dugay na ko nga nasayod niini, ug gani gitug-anan ko na ang akong mga higala nga may mga tawo karon nga ania sa Sugbo kansang tahas mao ang paglikidar sa mga nalambigit sa gidiling drugas.
Usa ka higayon, nagpatapak ko sa ligid sa akong sakyanan ug may nakahinabi ko nga nagpatapak sab sa ligid sa iyang motorsiklo. Sinati nako ang iyang dagway mao nga nagpakisayod ko kon diin kami nagkakita kaniadto.
Gitug-anan ko niya nga nakaila siya nako kay dugay ra siyang nakakita nako. Ang tinuod, higala diay sila sa kontrobersyal nga polis dinhi sa Sugbo kaniadto.
Nagkasuod mi, ug dihang gibuksan niya ang U-box sa iyang motor, nakita ko ang duha ka kalibre 45 nga pistola. Nakabantay tingali siya nga ingon sa misiga ang akong mata, nipahiyom siya ug mipikpik sa akong abaga.
Sa laktod, nasayran nako nga apil diay siya sa mga tawo nga sugoon kaniadto kon dunay mga daotang elemento nga gusto nang ipatodas sa kapolisan.
Nakabantay tingali ang maong tawo nga mora lang ko og wala makurat sa akong nasayran, mibutyag pa siya og dugang mga kasayuran.
Diha nako nasayri nga may mga tawo karon nga gikan sa laing lugar, ug ania sa Sugbo, aron sa paglikidar sa mga nalambigit sa gidiling drugas. Gani, ang uban may “patong” pa kon kini mapatay.
Mao na nga dili na ko masurprisa pa kon may mga tawo nga gidungog na nga nalambigit sa gidiling drugas ug pamatyon sa wala hiilhing mga tawo.
Aw, kitang wala malambigit sa gidiling drugas, dili angay’ng mahadlok, apan ang kuyaw lang kon masayop ang mga “hunter’s team” ug kita maoy ma-target.
Tan-awa si Konsehal Jun Gabuya, diriyot maoy gipusil didto sa Labangon, kay wala dayon mailhi si retired police Ahmed Lozano nga maoy ilang patyonon.
Sa laktud, bisan og wala kita malambigit sa gidiling drugas, apan magbantay gyud kita kanunay.
* * *
Akong awhagon si Cebu City Police Director Royina Garma nga mandoan niya ang kapolisan sa paghingusog sa kampanya batok sa gidiling matang sa sugal, sama sa illegal swertres, video karera ug moli-moli.
Ayaw pagtuo Senior Supt. Garma sa report sa imong mga polis nga napuo na nila ang mga illegal gambling sa tagsa-tagsa nila ka dapit kay daghan pa kaayo ang mi-report kanako nga midagsang pa ang mga video karera, moli-moli ug illegal swertres diha sa Ermita, Pasil, Suba, Sawang Calero, Duljo-Fatima.