Kalangay ang panimawos
Tangkod nga usa ka buwan human sa pag-abot sa Sugbo sa unang hugna sa tunga sa milyon ka sako nga imported nga bugas humay gikan sa Vietnam, wala pa gyud makabantay ang mga konsumidor og bisan unsa nga us-os sa presyo sa bugas humay sa kamerkadohan sa Sugbo, Bohol, Negros Oriental ug Siquijor.
Sukwahi ni sa pasalig sa mga economic managers ni Presidente Rodrigo Duterte nga motidlum og hangtud sa P7 matag kilo ang presyo sa commercial rice kon moabot na ang mas baratong bugas humay nga ipamaligya sa National Food Authority (NFA).
* * *
Nagpabilin nga taas ang presyo sa commercial rice kay hangtud karon wala pa’y bisan usa ka lugas sa NFA rice nga gipamaligya sa kamerkadohan.
Bisan og giapura sila ni Presidente Duterte sa pagsulbad gilayon sa krisis sa bugas humay, ang lokal nga kadagkoan sa NFA wa mag-apura sa pagtumod sa NFA rice sa kamerkadohan.
Nipasabot ang kadagkoan sa NFA sa Central Visayas nga wala pa ma-revalidate ang accreditation kay wa pa makasumiter ang NFA retailers sa tanang panginahanglan. Mao nga nag-una-una sila og pamaligya pinaagi sa rolling stores sa pinili nga mga barangay.
* * *
Nitiyabaw na ang pipila ka NFA retailers nga mga sakop sa Grains Retailers Confederation (GRECON) sa kalangayan sa kadagkoan sa NFA paglab-as sa ilang accreditation.
Wa gyud magtagad pagsusi sa ilang mga tindahan niadtong mga semana nga umaabot pa ang bugas humay gikan sa Vietnam ug Thailand ug karon pa molihok nga nadiskarga na ang bugas.
Nireklamo sab ang taga GRECON nga nisamot ang kalangan kay kalit lang giusab sa NFA ang mga panginahanglan.
* * *
Nagduda ang taga GRECON nga tinuyo ang paglangay-langay sa NFA. Nangagpas sila nga nanimawos ang lokal nga mga opisyal sa NFA sa pagsumiter sa GRECON og mga hulagway sa pagpamaligya sa NFA rice ngadto sa commercial rice traders, inay nila nga accredited retailers sa niaging tuig.
Gidasonan ang pasangil sa mga dokumento ni Cabinet Secretary Jun Evasco nga nagmatuod nga gipasimang ni NFA Administrator Jason Aquino ang NFA rice para unta sa Eastern Visayas ngadto sa commercial rice traders sa Bulacan nga gipangulohan sa asawa ni Aquino.
Apan gitaktak si Evasco sa NFA Council ug giapiki ang taga GRECON sa Sugbo.
* * *
- Latest
